Paraditen e kësaj të shtune mblidhet Këshilli i Rregullores dhe Mandateve për të shqyrtuar sërish kërkesën e prokurorisë për të marrë autorizimin mbi heqjen e mandatit dhe më pas arrestimin e ish-ministrit të Brendshëm, Saimir Tahiri, si i dyshuar në përfshirjen e trafikut të drogës midis Shqipërisë dhe Italisë.
Një ditë më parë, avokati mbrojtës i Tahirit kërkoi tre ditë kohë për t’u përgatitur për mbrojtjen ndaj akuzave të prokurorisë, por si përfundim kreu i mbledhjes Gramoz Ruçi vendosi ditën e sotme si shqyrtimin e kërkesës së prokurorisë, duke i dhënë disa orë kohë ish-ministrit të Brendshëm.
Por, situata për Tahirin është komplikuar kur dje pasdite mbërriti në Prokurorinë e Krimeve të Rënda një tjetër dosje nga Italia me mbi 1500 faqe, ku përflitet për përfshirjen e zyrtarëve të lartë të shtetit në trafikun e drogës dhe rolin që ka pasur ish-ministri i Brendshëm në këtë aktivitet kriminal.
Për këtë arsye, fashikulli prej 380 faqesh i përkthyer mendohet të jetë një nga provat shtesë më të rëndësishme të Prokurorisë e cila do ta përdorë ditën e sotme në kërkesën e saj drejtuar Këshillit të Mandateve, duke qenë se mazhoranca i cilësoi akuzat e prokurorisë si të bazuara vetëm në materialet e botuara në media.
Ndaj dosja e dytë e ardhur nga antimafia italiane mendohet të jetë një gur i fortë prove në gjithë historinë e përfshirjes së ish-ministrit të Brendshëm Saimir Tahiri në trafikun e drogës midis Shqipërisë dhe Italisë, që drejtohej nga kushërinjtë e tij, Habilaj.
Ndërkaq vetë Tahiri është mbrojtur duke sulmuar me shprehjen e Edi Ramës “nuk keni parë asgjë akoma”. Tahiri ka lëshuar kështu një mesazh të koduar në drejtim të kryeministrit dhe se do t’i shkojë deri në fund të vërtetës së kësaj çështje.
Megjithatë, sot pritet të shohim provat që do të servirë prokuroria dhe sa do të mundë të bindë ajo Kuvendin për të marrë autorizimin e arrestimit të ish-ministrit Tahirit. Dhe se çfarë të vërtetash do të rrëfejë Saimir Tahiri nëse do të tradhtohet nga vota e kolegëve të tij, ku përveç Tahirit duket rrjeti i përfshirjes shtrihet deri lart në zyrën e kryeministrit Rama. TIRANA TODAY
