Kryeministri i Maqedonisë, Zoran Zaev i ka cilësuar si të drejta dhe demokratike zgjedhjet lokale në Maqedoni, ndërsa shtoi se ai nuk mendon për zgjedhje të parakohshme parlamentare, por për marrjen e vendimeve më të rëndësishme për të ardhmen e Maqedonisë.
Po ashtu, Zaev foli mbi çështjen e emrit të Maqedonisë, ku kërkoi zgjidhjen sa më parë të saj, ndërsa apeloi edhe për kontributin e opozitës.
“Rezultatet nga zgjedhjet lokale më japin guximin shtesë për marrjen e vendimeve, duke përfshirë edhe zgjidhjen e kontestit me emrin. Maqedonia ka para vetes vendime serioze dhe të njëjtat duhet t’i marrë në mënyrë transparente, mes të tjerash edhe vendimet për problemin që Greqia e ka me emrin tonë kushtetues.
Do t’i bëja thirrje opozitës që të marrë pjesë në këtë çështje, por në funksion të gjetjes së zgjidhjes, e jo shtyrjes së saj, meqë me të vërtetë duam që Maqedonia të bëhet anëtarja e 30 e NATO-s dhe për arsye se kjo është e rëndësishme për vendimet që BE-ja do t’i marrë në pranverë. Të gjithë e dimë se duhet doemos të bëjmë diçka me këtë problem të ndjeshëm të imponuar nga pala greke”, tha Zaev.
Ndërkohë edhe kryeministri grek Tsipras, i cili ndodhet në Uashington deklaroi se Athina ka rol aktiv në politikën për zgjidhjen e kontestit me emrin në bazë të zgjidhjes së ndërsjellë të pranueshme me qëllim që të hapet perspektiva euroatlantike e Maqedonisë.
