Lufta kundër krimit të organizuar mbetet një nga kriteret kyç që duhet të përmbushë Shqipëria në procesin e saj të anëtarësimit në Bashkimit Evropian. Goditja e grupeve të struktura kriminale po i kërkohet me ngulm qeverisë shqiptare nga Brukseli. Ndërsa vetëm pak javë më parë, u shfaq hapur në qytetin e Elbasanit se si policia nuk mundi të reagonte kur një mjet i blinduar i një prej grupeve të tilla që operojnë në këtë qytet, goditi automjetin e nëndrejtorit të policisë së Elbasanit.
Për t’u përballur me grupimet e tilla kriminale kërkohet shumë më tepër se forca aktuale e policisë së Shtetit, ndaj pritet që në muajin nëntor të mbërrijnë në Shqipëri agjentë të huaj për të goditur grupe të tilla të strukturuara kriminale.
Operacioni do të ketë një mbështetje të gjerë dhe të fortë ndërkombëtare ndërsa agjentët do të veprojnë në terren për të goditur krimin e organizuar si dhe sekuestrimin e pasurive të akumuluara nga rrjetet kriminale.
Këtë e bëri të ditur edhe vetë kryeministri Edi Rama një ditë më parë në seancën parlamentare. “Brenda muajit nëntor do të vijnë këtu agjentë të specializuar që do të punojnë ngushtësisht me Policinë e Shtetit, me Ministrinë e Brendshme, me Shërbimin Informativ dhe me të gjitha agjencitë e tjera për këtë punë”, deklaroi Rama.
Ndërkaq, nga ana tjetër, kreu i Partisë Demokratike, Lulzim Basha saktësoi se sektori bankar po depërtohet nga krimi përmes parave që vijnë nga aktivitetet kriminale. Ndaj sipas tij, ky operacion do të godasë elementët kriminalë që kanë lidhje me qeverinë.
“Sektori bankar po depërtohet nga krimi, në kuptimin e financimit me fajde të parave të drogës dhe në kuptimin e angazhimit të bankave të caktuara në sektorin bankar në industrinë e pastrimit të parave të drogës”, tha Basha.
Operacioni, sipas kyeministrit Rama është konsultuar nga ambasadori amerikan edhe me kryetarin e opozitës, për të marrë mbështetjen e saj.
“Ambasadori amerikan takon kryetarin e opozitës, i kërkon mbështetje për këtë operacion, kryetari i opozitës vjen këtu dhe siç e ka zakon, me fjalët e të huajve bën atë që e ka mësuar të bëjë lideri legjendar (Sali Berisha), që i përdor takimet me të huajt siç i do qejfi dhe bën atë paralajmërimin e famshëm: prit prit se javën tjetër do ta dëgjoni”, tha Rama.
Komuniteti ndërkombëtar në vend është alarmuar nga prania dhe forca që po ushtron në vend krimi i organizuar. Aq sa ambasadori amerikan, Donald Lu ngriti alarmin se Shqipëria dominohet nga familjet kriminale. “20 familje kriminale, katër klane kriminale! E thotë Departamenti i Shtetit. Ta ka thënë përpara dhe nëse kam një vërejtje për ambasadorin Lu është se e hapi gojën pas zgjedhjeve. Por, më mirë vonë se kurrë”, vijoi më tej Basha.
