Kryeministri Edi Rama ka marrë sot fjalën në foltoren e Kuvendit, nga ku akuzoi opozitën se ka humbur përgjegjshmërinë.
Kryeministri ironizoi Partinë Demokratike, teksa tha se nuk ka asnjë faj që është në këtë gjendje, por faji është i atyre që kanë sukses.
Teksa përmendi rezultatin e zgjedhjeve, Rama tha se nuk e shqetëson fati i PD-së, por i opozitës si institucion që është gjithnjë dhe më e dobët.
Kryeministri përmendi edhe incidentin e djeshëm, teksa tha se vetë opozita s’lë gjë pa thënë dhe më pas hidhet përpjetë kur dikush i thotë nëpër dhëmbë “të rrjedhur”.
FJALA E RAMËS:
E vërteta është se në 25 qershor shqiptarët votuan në një qartësi, e thotë raporti se procesi zgjedhor ishte në përputhje me standardet e BE-së.
Procesi zgjedhor ka jo pak probleme që kërkojnë zgjedhje. Ne jo vetëm nuk e bëjmë dot diskutimin sot për shkakun tuaj sepse jeni bosh lart e poshtë, bosh para e bosh prapa. Nuk jeni as të vërtetë, as seriozë, as të përgjegjshëm në raport me veten dhe pastaj në raport me rezultatin e zgjedhjeve.
Rezultati ishte i thellë, por edhe kuptimplotë. Ju nuk jeni humbësa se nuk fituat zgjedhjet, ju jeni humbësa sepse nuk keni as dëshirën për të mos kthyer leximin e votës në shpifje për zgjedhësit.
PS mori shumë më shumë vota se 4 vjet më parë, PD mori shumë më pak vota.
Keni ardhur këtu me çadrën tuaj të vjetër në krah.
Përgjegjësi është një fjalë e huaj për ju dhe ju kurrë nuk do ta kuptoni rëndësinë e saj.
Përgjegjësia është çelësi për suksesin e çdo sipërmarrje, ju këtë çelës e keni humbur prej kohësh dhe bashkë me të edhe aftësinë për të bërë sukses. Ju dini vetëm të ndërtoni strategji kundër suksesit të tjerëve, por për suksesin tuaj e keni humbur çelësin që është strategji.
Nuk na shqetëson fati i PD-së, por na shqetëson fati i opozitës si institucion. S’leni gjë pa thënë dhe më pas hidheni përpjete kur dikush ju thotë nëpër dhëmbë “keni rrjedhur”.
Nuk është faji juaj që shkoni nga disfata në disfatë, që dilni për republika të reja dhe ktheheni këtu akoma më pak. Forumet tuaja nuk e kanë dëgjuar një fjalë të vetme reflektimi se çfarë ka ndodhur në zgjedhjet e 25 qershorit?
Ju jeni të pafajshëm, asnjë shenjë përgjegjshmërie. Në 2013 e kishte fajin populli që nuk ju votoi, në 2015 e shpallët humbjen fitore, në 2017 hapët fushatën duke festuar në çadër rrëzimin e gjysmës të qeverisë.
Ju s’keni asnjë faj, fajin e kemi ne që bëjmë sukses. Sot bëni trimin dhe ngrini volumin, njësoj si frikacaku që këndon me zë të latë kur përshkon pyllin ën errësirë.
Sa të ketë krim drogë dhe mafie, ju e keni në terezi. Rrini dhe priteni pushtetin t’ju vijë. Krimet dhe droga e kanë fajin që ju keni papërgjegjshmëri./Tirana Today
