Banka e Shqipërisë ka kryer një anketë ku rezulton se papunësia u ul gjatë 6-mujorit të parë të 2017 për shkak të rritjes së punësimit në shtet.
Në këtë anketim morën pjesë 1209 familje të përzgjedhura sipas një kampioni rastësor, ku 55% e tyre jetojnë në zonat urbane dhe 45% në zonat rurale të vendit.
Anketimi vrojtoi gjendjen financiare të këtyre familjeve, ku rezulton se gjatë gjashtëmujorit të parë të vitit 2017, numri i të punësuarve në kampionin e vrojtuar ka shënuar rritje në terma vjetorë, mbështetur kryesisht nga punësimi në sektorin shtetëror.
Në gjysmën e parë të vitit, punësimi u nxit më së shumti nga fushatat e zgjedhjeve parlamentare, një fenomen i njohur ky në vendin tonë, ku punësimet janë bërë kryesisht në ndërmarrjet publike.
Nga ana tjetër, Banka e Shqipërisë pohoi se niveli i të ardhurave të familjeve dhe niveli i shpenzimeve kanë qenë në rritje gjatë periudhës, por rritja e shpenzimeve ka rezultuar më e madhe, duke sjellë ngushtim të balancës financiare të familjeve shqiptare.
