Ish-kryeministri Sali Berisha, në pushim të seancës plenare ka dhënë një deklaratë për mediat, ku ka bërë një parashikim, sipas të cilit qeverinë nuk e zë as dhjetori.
Berisha tha se biznesmenët po ikin ngaShkodra, pasi aty ligjin e bëjnë trafikantët, ndërsa akuzoi Ruçin se po fut në parlament metoda policore.
“Shqipëria është në sundimin e plotë të qeveritarëve të drogës e të krimit, në këtë kontekst, duhet t’u them që ajo që shpërtheu në Elbasan, më agresive është në Shkodër, qytet nga i cili po ikin biznesmenët.
Në Shkodër bëjnë ligjin trafikantët në çdo sekondë. Vlorën e patë vetë në ç’katandisje është. Shqipëria ka në krye të meduzës të krimit të organizuar dhe ai është Edi Rama.
Për mua, kryekumbara i Shqipërisë është Edi Rama, sepse kur iu kërkua të mos vendosë Artur Bushin, e vendosi. Shkoi dhe u tha shqiptarëve se burrë më të ndershëm se Elvis Roshi nuk ka, është Edi Rama që në Shkodër ato 5 vota që merr, i merr me krimin, e mbushi parlamentin me kriminalë, është Rama vëllai i të cilit Olsi ka kaluar kufirin me makinën e famshme të kokainës.
Kjo shumicë po tregon se dhjetori, siç e ka nis me frikë nuk e zë. Ruçi po fut në parlament metodat e vjetra policore. I bëj thirrje të heqë dorë se janë të patolerueshme”, tha Berisha.
I pyetur nga gazetarët jashtë sallës së Kuvendit për lëvizjen brenda PD për ringritjen e partisë, ish-kryeministri Sali Berisha vuri në dyshim nëse platforma e shpërndarë në media është origjinalja, teksa tha se ai nuk ka më asnjë funksion në PD.
“Unë s’kam parë, kam lexuar në media, po ajo platformë nëse është origjinalja i dorëzohet kryesisë së partisë, i dorëzohet PD-së dhe bëhen vlerësimet. Unë jam jashtë çdo funksioni siç e dini në PD,” tha Berisha duke ikur.
