Ministri i Jashtëm serb, Ivica Daçiç, thekson se Kosova nuk mund të jetë rast i ndarë dhe specifik nga ai i Katalonjës. “Ky është veprim i njëanshëm i Katalonjës, siç ka qenë veprim i njëanshëm ai i Kosovës, ndërsa bashkësia ndërkombëtare dhe Bashkimi Evropian thonë se Spanja është anëtare e BE-së, por çka nënkupton kjo konkretisht?”, ka thënë Daçiç për televizionin publik serb.
Daçiç u shpreh se Kosova nuk mund të jetë rast i ndarë dhe ajo që i është bërë Serbisë, sipas tij, është shkelje e së drejtës ndërkombëtare, sikurse edhe në rastin e Katalonjës. “Kemi paralajmëruar se kjo është “Kutia e Pandorës” e cila nuk do të përfundojë vetëm me pavarësinë e Kosovës”, ka deklaruar ai.
Më herët, Komisioni Evropian specifikoi se rasti i Katalonjës nuk mund të krahasohet me atë të Kosovës. Institucioni i lartë i Bashkimit Evropian e shpalli antikushtetues referendumin e Katalonjës. Ndërsa e cilëson kontekstin politik të Katalonjës me atë të Kosovës si dy realitete krejtësisht të ndryshme.
“Kur bëhet fjalë për njohjen e Kosovës, ky është kontekst shumë specifik. Ky ishte qëndrimi i pranuar nga ana e Deklarimit të KB dhe Rezolutave të ndryshme të KB dhe të komunitetit ndërkombëtar. Kontest shumë specifik, me arsyet specifike”, ka deklaruar zëdhënësi i Komisionit Evropian Margaritis Schinas.
Komisioni Evropian, duke iu referuar Kushtetutës spanjolle, votimi në Katalonjë ishte i jashtëligjshëm. “Për Komisionin Evropian, kjo është çështje e brendshme e Spanjës, e cila duhet të zgjidhet në përputhje me ligjet kushtetuese të Spanjës. Ne e përsërisim qëndrimin të cilin e kanë pasur edhe Komisioni Evropian i mëparshëm, e kjo është se, në rast se ky referendum organizohet në përputhje me Kushtetutën spanjolle kjo do thoshte se ky territor i cili po shkon do të gjendej jashtë BE-së”, ka thënë Schinas duke tentuar ta arsyetojë qëndrimin e Komisionit Evropian.
