Ish-kreu i LSI-së, Petrit Vasili ka reaguar lidhur me deklaratat e Ramës të bëra sot gjatë një takimi me sipërmarrësit e vendit.
“Të gjithë doganierët do largohen brenda 100 ditëshit, se ça ndërmjetësojnë ata unë s’e kam marrë kurrë vesh po shyqyr që na e dha populli mandatin vetëm që të mos kemi merakun se ngacmojmë ndonjë”, thumboi Rama gjatë takimit të sotëm
Duke iu referuar kësaj deklarate, por edhe fjalës së Ramës lidhur me veshjen e inspektorëve, Vasili shkruan se kryeministri “është bërë njeriu-barcaletë botërore i veshur si damlla”.
Më tej, kreu i grupit parlamentar të LSI-së shkruan se përgjegjësinë për biznesin e ka vetë Rama, pasi vetë ka pasur timonin dhe tepsinë e tatimeve, doganave dhe gjithçka”.
“Lajmërojeni shkollëpakun që i ka pasur vetë tatimet, doganat etj. Pasi ky s’di gjë dhe bëhet qesharak në llafazanërinë e tij ambulante”, ironizon më tej Vasili.
DEKLARATA E PLOTË:
Kryeministri-barcaletë u flet inspektorëve për veshjen…
Ky shkollëpakti paska hallin e veshjes së inspektorëve. Humor që të gajas…
Ky për vete bën lajm kur vete nëpër bote i veshur si damlla dhe për këtë është bërë njeriu-barcaletë botërore, po për të kjo është normale, bile është edhe qejf i madh, megjithëse Shqipërisë i nxihet faqja për shkak të këtij.
1. Këtë standard karagjozësh dhe shteti karagjoz ka vendosur pa kthim po vetë ky njeriu-barcaletë, ndaj çfarë u kërkon të tjerëve?
2. Sa për përgjegjësinë për biznesin e ka të gjithën po ai, pasi po vetë e ka pasur timonin dhe tepsinë e tatimeve, doganave e gjithçka dhe po ai, duke i përdorur ato, dhunoi bizneset dhe u shkatërroi besimin e tyre.
Lajmërojeni shkollëpakun që i ka pasur vetë tatimet, doganat etj. Pasi ky s’di gjë dhe bëhet qesharak në llafazanërinë e tij ambulante.
