Kreu i PD-së, Lulzim Basha ka mbajtur fjalën e parë si deputet në parlamentin e Shqipërisë, ku bëri një përmbledhje, duke akuzuar Ramën se bleu votën e shqiptarëve dhe se solli eksodin masiv të shqiptarëve.
Më tej Basha tha se kryeministri e shkatërroi marrëveshjen e 18 majit me zgjedhjen e Ruçit në krye të Kuvendit.
FJALA E BASHËS:
Dje, fiks pas 4 vitesh, Rama rikthehet në të njëjtin vend pa mbajtur asnjë premtim me shpresën se do t’ia hedhë edhe njëherë. Por, këto ishin 4 vite ferri për shqiptarët.
Nëse zgjedhjet do të ishin të lira, ti dhe ekipi yt nuk do të ishit ulur aty. Për mua dhe opozitën është koha të bëjmë bilancin munguar. Është qeveria e parë që ka bërë hapa mbrapsht pasi disa qeveri evropiane janë duke konsideruar kthimin mbrapsht të vizave.
Rama 1 ka marrë 3 miliard borxh në 4 vite. Rama 1 është e para qeveri që nuk ka bërë thuajse asnjë investim në infrastrukturën e transportit. Nuk arriti dot të mbaronte as rrugët e mbetura të Elbasan-Tiranë. Në vend të tyre 600 mln euro shkuan për udhëtime luksi.
Qeveritë e huaja i dhanë ultimatum Rama 1 që të largonte ministrin e Brendshëm të lidhur direkt me drogën. Rama 1 solli eksodin masiv të shqiptarëve, duke renditur Shqipërinë gati në të njëjtin nivel me Sirinë.
Marrëdhëniet me Italinë kanë humbur çdo përmbajtje. Në këtë sallë dhe jashtë saj, PD luftoi pa kompromis kundër kësaj sëmundjeje fatale për mirëqenien dhe demokracinë e shqiptarëve. Rama 1 e mbushi vendin me drogë dhe kjo nuk mbulohet dot nga askush. Rama 1 varfëroi dhe më pas i njollosi shqiptarët duke u blerë votën dhe as kjo nuk mbulohet dot nga askush. PD do të jetë opozita ballore pa kompromis, dhe do luftojmë duke ia kthyer pushtetin shqiptarëve.
I vetmi sukses i 18 majit është që ti nuk arrite ta emërosh opozitën tënde siç e kishe nisur. Opozita përfaqëson sot votën më të pastër, votë morale që i rezistoi joshjes.
Nëse 25 qershori e prishi marrëveshjen e 18 majit, 9 shtatori e shkatërroi atë me zgjedhjen e Gramoz Ruçit në krye të kuvendit. E ardhmja e Shqipërisë nuk ka qenë kurrë më në pikëpyetje se sot./Tirana Today
