Ngërçi politik duket se do të ndikojë negativisht në procesin e integrimit të shtetit të Kosovës.
Ramush Haradinaj, i dominuar për kryeministër nga koalicioni PAN, kishte siguruar se tre muaj pas formimit të Qeverisë, Kosova do t’i plotësojë kushtet për liberalizimin e vizave.
Megjithatë, po bëhen tre muaj nga fitorja e koalicionit PAN në zgjedhjet e 11 qershorit dhe Haradinaj nuk ka arritur që ende të formojë as Qeverinë e vendit.
Këtë ngërç, profesori Dashnim Ismajli e quan pengues për proceset integruese.
“Proceset integruese janë stopuar dhe ky stopim vjen pikërisht si rezultat i mosfunksionimit të institucioneve politike për t’i kaluar proceset që presin vendin”, ka thënë Ismajli. Në një prononcim për “Zërin”, ai ka shtuar se papërgjegjshmëria politike në Kosovë tashmë ka dhënë sinjalet e saj negative ndërkombëtarisht.
“Trendi i zhvillimeve në Kosovë ka sfiduar procesin tej mase dhe pasojat do të vërehen edhe për një periudhë të gjatë kohore. Sa i përket një liberalizimi vizash nga Bashkimi Evropian nuk mendoj se kjo do të ndodhë në një afat të shkurtër kohor. Kjo varet edhe nga zhvillimet politike në vend, se sa është Kosova e aftë të kalojë këtë ngërç politik, të ndërtojë një qeveri e qëndrueshme, e cila do të jetë e gatshme t’i përshpejtojë proceset që e presin dhe të shkurtojë rrugën integruese të shtetit të Kosovës”, ka përfunduar ai.