Një seancë e re negociatash nis sot në Bruksel në një klimë të tendosur, mes britanikëve në padurim për të diskutuar rreth marrëdhënieve të ardhshme tregtare me BE dhe palën evropiane që kërkon të përqendrohet fillimisht në organizimin e procedurave të ”divorcit”.
Raundi i tretë që pritet të përfundojë të enjten, do të nisë këtë pasdite në selinë e Komisionot Evropian, nga kryenegociatori i BE për Brexit, Michel Barnier dhe homologu i tij britanik, David Davis.
Kjo seancë e re bisedimesh nuk vjen në momentin më të favorshëm, pasi evropianët kritikojnë për “trajtim sipërfaqësor” qëndrimet e britanikëve, të cilët i kanë bërë ftesë në këmbim BE-së për të mos ushtruar presion në vendimmarrje.
Vetëm me kushtin e arritjes së “progreseve të kënaqshme” në këto fusha pala evropiane do të bjerë dakord për të diskutuar, në një fazë të dytë negociatash, rreth marrëdhënieve në të ardhmen me Britaninë e Madhe në planin tregtar.
Britania e Madhe, një anëtare e BE-së që prej vitit 1973, është vendi i parë që ka kërkuar të largohet nga blloku i BE-së pas një referendumi vitin e kaluar.
BE-ja pret që Britania e Madhe të përdorë raundin e tretë të bisedimeve për të sqaruar qëndrimet e saj ndaj çështjeve kryesore lidhur me largimin e saj nga blloku i Bashkimit Evropian, duke qënë e nevojshme për të kaluar në fazën e dytë të bisedimeve mbi marrëdhëniet e ardhshme midis vendit dhe BE-së .
Gjatë bisedimeve këtë javë, të dy palët do të diskutojnë mbi çështjet e të drejtave të qytetarëve, zgjidhjen financiare, çështjet e ndarjes, të tilla si mallrat në treg dhe bashkëpunimi gjyqësor në çështjet civile dhe penale, qeverisjen e marrëveshjes dhe çështjen e Irlandës dhe Irlandës së Veriut.
Javën e kaluar një zyrtar i lartë i BE-së e përshkroi propozimin e Britanisë për të shmangur kufirin midis Irlandës dhe Irlandës së Veriut pas Brexit si “shumë magjik” duke i kërkuar Britanisë së Madhe që ta trajtonte çështjen në thelb në bisedimet e Brexit.
Megjithatë, Britania e Madhe ka kërkuar më shumë fleksibilitet nga ana e Brukselit dhe dëshiron të nisë diskutimet lidhur me marrëdhënien post Brexit të Londrës me bllokun e BE-së, dhe jo vetëm çështjen e ndarjes së saj.
Bisedimet midis grupeve nga të dy palët do të nisin sot pasdite dhe do të përfundojnë ditën e enjte.
