Një atentat me armë zjarri ka ndodhur sot në Shijak ndaj biznesmenit Dashamir Gjoka. Një person ka qëlluar me kallashnikov në drejtim të automjetit të blinduar të biznesmenit. Në momentin e atentatit, brenda makinës kanë qenë biznesmeni Gjoka, gruaja dhe vajza.
Ngjarja ka ndodhur pranë fshatit Xhafëzotaj, ndërsa mësohet se nuk ka persona të lënduar.
Pas atentatit të shpëtuar tek “4 rrugët e Shijakut”, Gjoka është nisur drejt komisariatit të policisë për të denoncuar ngjarjen.
Policia po punon për identifikimin dhe kapjen e autorëve, të cilët u larguan menjëherë nga vendngjarja. Nuk dihen ende motivet e atentatit, ndërsa po punohet për zbardhjen e ngjarjes.
Gjoka rezulton person me precedentë të mëparshëm penalë, pasi ndaj tij është e hapur një çështje për pastrim parash, ndërkohë që prokuroria i ka sekuestruar pasuritë.
