Ndryshe nga sa mendohej se presidenti i SHBA-ve Donald Trump nuk tregon ndonjë interes për rolin e kryeministrit shqiptar Edi Rama apo rolit të Shqipërisë në rajon, kur vjen çështja tek diplomacia, amerikanët tregohen të kujdesshëm.
Për këtë arsye, Sekretari Amerikan i Shtetit, Rex Tillerson ka telefonuar kreun e ekzekutivit jo vetëm për fitoren në zgjedhjet e fundit parlamentare, por edhe në rrugën që do të ndjekë Shqipëria përgjatë këtij 4-vjeçari.
Sipas burimeve të Kryeministrisë, Tillerson në urimin e tij ka shprehur bindjen se mandati që ka marrë për të qeverisur e vetme, e obligon Partine Socialiste të thellojë shpejtësinë e reformave, pastrojë administratën nga të korruptuarit dhe shënojë rezultate domethënëse në luftën kundër krimit.
Duke i shprehur Kryeministrit të gjithë mbështetjen e qeverisë amerikane në mandatin e ri qeverisës, Sekretari i Shtetit i ka përcjellë Edi Ramës përshtypjet shumë pozitive të Zëvendës Presidentit Pence nga takimi i javës së shkuar në Malin e Zi dhe ka rikonfirmuar vullnetin amerikan për një vëmendje të përqendruar në zhvillimet në rajon.
Kryeministri Rama e ka falënderuar Tillersonin për telefonatën dhe i ka bërë një pasqyrë të plotë të situatës rajonale nga këndvështrimi i vendit tonë, duke u përqendruar kryesisht tek dialogu Kosovë – Serbi dhe nevoja për zhbllokimin e ngërçit të emrit të Maqedonisë.
Në pjesën e fundit biseda është shtrire tek roli i Shqipërisë në NATO, kontributi i saj në luftën kundër ekstremizmit të dhunshëm, ku Sekretari Tillerson është shprehur me konsideratat më të larta. Ndërsa Kryeministri Rama ka kërkuar intensifikimin e bashkëpunimit me SHBA në sektorin e energjisë dhe posaçërisht të naftës e të gazit, çka është pritur me shumë interes nga bashkëbiseduesi. Biseda telefonike mes të dyve ka zgjatur më shumë se njëzetë minuta, sipas Kryeministrisë.
