Në shtëpinë tuaj fshihet një përbindësh. Në fakt, shumë syresh. Ata gjenden atje duke ju pritur. Tek frigoriferi, furra dhe kuzhina juaj, pasi duket se një nga gjërat më të rrezikshme me cilat keni të bëni çdo ditë, është pikërisht ushqimi juaj. Historia njerëzore është e mbushur plot me episode të tmerrshme, të shkaktuara nga ushqimet tona të konsumit të përditshëm.
Buka
Gjatë viteve 1800, popullsia e Anglisë po rritej më shpejt se kurrë më parë. Në fakt, në vitin 1850, Londra ishte qyteti më i madh në historinë botërore. Por, kjo rritje e papritur dhe e jashtëzakonshme, çoi në mungesa serioze të artikujve të përditshëm, dhe prodhuesit spekulantë u hodhën menjëherë në veprim, duke i përzier produktet e tyre me çfarëdolloj gjëje që mund të gjenin poshtë qilarëve të tyre.
Çimento nga Parisi, dhe madje edhe shkumësi u përdor për të shtuar masën e produkteve ushqimore, por më e keqja ishte përdorimi i aluminit toksik, që i jepte bukës një ngjyrë më të bardhë. Por ky element përveçse helmues, parandalon tretjen e ushqimin nga zorrët. Kjo shkaktoi një epidemi rëndë të kequshqyerjes, diarresë, madje edhe të vdekjeve të shumë fëmijëve, pasi qytetarët e uritur nuk ishin më në gjendje të tresnin edhe ato pak mbetje të vogla ushqimore që mund të gjenin rrugëve.
Misri
Në fillimin e shekullit XX, Amerika Jugore u prek nga një sëmundje e re e tmerrshme. Sëmundjet e lëkurës dhe çrregullimet mendore ishin shenjat paralajmëruese të sëmundjes misterioze që quhej “pelagra”, që mori jetën e mbi 100.000 njerëzve mes viteve 1906-1940. Për me tepër, askush nuk po e kuptonte origjinën e saj.
Ndërkohë mjeku amerikan Dr. Xhozef Goldberger, zbuloi se sëmundja godiste vetëm të varfrit, të cilët mbijetonin me një dietë ushqimore të përbërë pothuajse tërësisht nga një lloj i veçantë misri. Por përfundimet e tij nuk u pritën mirë nga mjekët e jugut, që ishin të bindur se sëmundja ishte shkaktuar nga një embrion.
Peshku
Për disa, ngrënia e peshkut të papërpunuar, mund të jetë diçka e neveritshme, por një element tjetër i jep sushit japonez një arsye madhore për t’u pasur frikë. Peshku tullumbace, ose fugu, përgatitet me një kujdes ekstrem nga shefat e sushit. Ligji në Japoni e kërkon këtë. Qeveria e rregullon procesin me kujdes, pasi një gabim i vetëm mund t’i marrë jetën ndonjë klienti.
Organet e këtij peshku janë të mbushura me një substancë të quajtur tetrodotoksina. Nëse ajo del jashtë dhe ndot mishin, ky helm i pabesueshëm fillon të mpijë fillimisht gojën e konsumatorit, dhe shumë shpejt nga mpirja lokale kalohet në paralizë të plotë, e cila dalëngadalë prek të gjithë trupin.
Viktima është plotësisht i paaftë për të lëvizur, edhe pse tërësisht i vetëdijshëm. Vdekja ndodh kur paraliza arrin në mushkëri, dhe klienti mbytet gradualisht. Fatmirësisht, për shkak të ligjeve të rrepta në lidhje me përgatitjen e këtij lloj peshku, vetëm 23 persona kanë humbur jetën nga fugu gjatë 16 vitet e fundit në shtetin e njohur aziatik.
Uji
Përgjatë historisë, ethet e tifos kanë marrë jetën e shumë njerëzve. Epidemitë e vogla qenë shumë të zakonshme deri vonë, por në vitin 1903, qyteti i Itakës në shtetin e Nju Jorkut në SHBA, u përball me një shpërthim të papritur dhe jashtëzakonisht agresiv të sëmundjes së tmerrshme. Kohët e fundit, kishte filluar ndërtimi i digës Six Mile Creek, ndërsa pronarët kishin lënë pas dore vendosjen e filtrave të ujit.
Kushtet e punëtorëve ishin skandaloze, ndërsa disa prej tyre sapo kishin shkuar në SHBA nga një zonë e Italisë e njohur për shpërthimet periodike të epidemisë së tifos. Pasojat qenë katastrofike. Banorët e Itakës filluan të përjetonin dhimbje të forta në stomaku, dhe ethe të padurueshme. Sëmundja ishte përhapur shumë, para se dikush të kuptonte se përgjigjes ishte uji. Deri sa situata u normalizua 82 vetë, përfshirë 29 studentë, humbën jetën.
Djathi
Listeria monocytogenes, është një bakter veçanërisht i rrezikshëm. Tek njerëzit, ai shkakton një gjendje të rëndë shëndetësore të quajtur listerioza, që në pamje të parë mund të ngjajë me një grip të zakonshëm, por që mund të infektojë edhe sistemin nervor, duke shkaktuar konvulsione dhe vdekje.
Ky bakter preferon në mënyrë të veçantë djathin. Produktet që përmbajnë qumësht të papasterizuar, janë shënjestra kryesore e listeriozës. Në vitin 1985, kompania “Jalisco” në Kaliforni prodhoi një sasi djathi pa ndjekur procedurat e pasterizimit. Kjo shkaktoi një nga shpërthimet më të mëdha të listeriozës në histori.
Kalifornia Jugore u tmerrua nga sëmundja neurologjike vdekjeprurëse, e cila goditi gratë shtatzëna dhe foshnjat e porsalindura. Numri i të vdekurve arriti në 62 persona, duke përfshirë edhe lindjen e shumë foshnjave të vdekura. Dhe ky nuk ishte një incident i izoluar. Shpërthimet e listeriozës të lidhura me djathin janë të zakonshme edhe në ditët tona.
