Kandidati për kryeministër i “Vetëvendosjes”, Albin Kurti është shprehur se ka mbështetjen e ambasadorëve të rëndësishëm ndërkombëtarë në Kosovë për ta bërë Qeverinë.
Në një intervistë për “Zërin”, Kurti tha se “përmes zgjedhjeve të fundit populli tregoi se e do një qeverisje nga LVV-ja, mbështetjen ndaj së cilës e kanë konfirmuar edhe ambasadat kryesore të huaja në Prishtinë. Në të kundërtën, Kosova rrezikon të qeveriset nga PAN-i, i varur nga Lista Serbe dhe nga Beogradi, e ku rreziqet do të ishin të paditura dhe të papritura”.
Megjithatë, kandidati për kryeministër i lëvizjes “Vetëvendosje” thotë se kjo do të ndodhte vetëm përkohësisht, sepse partia e tij tani ka fuqi të mjaftueshme për ta ndalur “PDK-në e vogël”, siç e quan ai dhe për t’u bërë gati për zgjedhje të shpejta.
“Nëse do të kishte sërish zgjedhje të reja, “Vetëvendosja” do të dilte me mbi 40 deputetë. Këtë e dinë edhe subjektet e tjera, prandaj po përpiqen medoemos të shmangin përsëritjen e zgjedhjeve”, ka thënë ai.
Më tej, Kurti u shpreh se aktualisht Kosova ka vetëm dy opsione: “Të lejohet udhëheqja e PDK-së dhe SHIK-u që ta vazhdojnë plaçkitjen dhe kapjen e shtetit, apo të ndalet përfundimisht kjo gjë, me një qeverisje të Lëvizjes që do të punonte për krijimin e shtetit të së drejtës”, ka thënë ai.
