Instituti i Statistikave ka publikuar raportin “Indeksi i Harmonizuar i Çmimeve të Konsumit” për muajin qershor të vitit 2017.
Sipas këtyre të dhënave, ndryshimi vjetor i Indeksit të Harmonizuar të Çmimeve të Konsumit* në qershor është 3,7 %, duke e renditur Shqipërinë të parën mes shumë shteteve.
Ajo që bie në sy është rritja e çmimeve të grupit “ushqime dhe pije joalkoolike” me 8,8 %, pasuar nga grupet “mallra dhe shërbime të ndryshme” me 3,1 %, “qira, ujë, lëndë djegëse dhe energji” me 1,8 %, “argëtim dhe kulturë” me 1,6 %, etj.
Ndërsa, çmimet e grupit “veshje dhe këpucë” u ulën me 2,4 %, pasuar nga grupi “mobilie shtëpie dhe mirëmbajtje” me 1,4 %.
Në Qershor 2017, ndryshimi mujor i Indeksit të Harmonizuar të Çmimeve të Konsumit është -0,3 %, i ndikuar kryesisht nga ulja e çmimeve të grupit “ushqime dhe pije jo alkoolike”.
*Indeksi i Harmonizuar i Çmimeve të Konsumit (IHÇK) mat ndryshimin e nivelit të çmimeve me pakicë të mallrave dhe shërbimeve nga pikëpamja e strukturës së shpenzimeve të cilat konsumatori (vendas dhe i huaj) synojnë për konsumin final në territorin e Shqipërisë. IHÇK përdoret për monitorimin e lëvizjes së çmimeve me pakicë në vendet Evropiane, duke krahasuar përqindjen e inflacionit ndërmjet vendeve të Evropës.
