Vlorë, policia vijon operacionin, sekuestron 600 kg drogë

Policia e Shtetit ka vijuar operacionin masiv antidrogë në rrethinat e Vlorës. Operacioni i cili vazhdon që prej mëngjesit të sotëm, këtë pasdite është përqendruar në Llakatund dhe në fshatin Drithas, ku është sekuestruar një sasi lënde narkotike rreth 600 kg, e llojit cannabis sativa.
Sipas njoftimit të Policisë, nga hetimet paraprake, kjo pjesë territoriale dyshohet se është pronë e shtetasit Myzafer Tushaj dhe të vëllait të tij F. Tushaj.
‘‘Sasia është gjetur gjatë kontrollit të territorit përreth ku u gjet sasia e madhe gjate operacionit. Për kontrollin është përdorur qeni antidrogë. Efektivet e Policisë pranë Drejtorisë Vendore të Policisë Vlorë, në bashkëpunim të ngushtë me Prokurorinë e Vlorës, menjëherë nga krehja që i kanë bërë zonës përreth terrenit ku u konstatuar dje lënda narkotike, ditën e sotme kanë gjetur një sasi tjetër me lëndë narkotike në pjesën perëndimore të fshatit Drithas, Vlorë. Lënda narkotike u gjet e fshehur nëpër shkurret e një përroi, e vendosur në disa thasë sintetikë të cilët përmbajnë pluhur të imët, të ngjashme me atë të llojit Cannabis Sattiva. Dyshohet se kjo sasi mund të jetë rreth 600 kg. Krehja e zonës është kryer gjithashtu edhe me ndihmën e qenit antidrogë të specializuar për konstatimin e saj. Nga hetimet paraprake, kjo pjesë territoriale dyshohet se është pronë e shtetasit Myzafer Tushaj dhe të vëllait të tij F. Tushaj. Vazhdojnë veprimet e mëtejshme të transportimit të saj drejt ambienteve të DVP Vlorë’’, thuhet në njoftimin e Policisë së Shtetit.