Veprimet bankare përmes internetit janë rritur ndjeshëm, pasi vetëm në tremujorin e parë të këtij viti, numri i transaksioneve online arriti në mbi 162 mijë.
Shifrat janë publikuar nga Banka e Shqipërisë dhe dëshmojnë një rritje të ndjeshme: 41% më e lartë se tremujori i parë i vitit të kaluar.
Rritja është e dukshme edhe në volumin e transaksioneve, pasi vlera e veprimeve bankare përmes sistemit për tre muajt e parë të vitit arriti në afro 40 miliardë lekë, pra 60% më shumë krahasuar me të njëjtën periudhë të vitit të kaluar.
Shërbimet e bankingut janë përhapur në vendin tonë si pasojë e modernizimit të shërbimeve bankare dhe rritjes së përdorimit të teknologjisë në shoqërinë shqiptare. Në vendin tonë, 12 nga 16 banka tregtare ofrojnë shërbime të internet banking.
Llogaritë bankare të aksesueshme nga interneti në fund të vitit të kaluar ishin rreth 209 mijë, ndërsa rreth 86% e llogarive të lidhura me internetin i takojnë individëve.
Pjesa më e madhe e veprimeve bankare në distancë kryhen nga individët, ndërsa në volume mbizotërojnë transaksionet e bizneseve, që prekin vlera më të larta.
