Lulzim Basha dhe Eduard Selami nisin nesër garën për kreun e Partisë Demokratike. Pasi përjashtuan zërat kundër nga kandidimi tashmë fusha e betejës për ta mbetet e qetë, edhe pse të dy i ndjek hija e Berishës.
Shumë eksponentë të selisë blu dhe figura historike të saj e kanë cilësuar këtë proces si një farsë dhe deformim të Partisë Demokratike. Ato nisën që pas disfatës së kësaj force politike në zgjedhjet e fundit parlamentare me Jozefina Topallin, Arben Imamin dhe vijojnë ende me të përjashtuarin nga gara, Astrit Patozi.
Gara midis këtyre dy politikanëve është një garë praktikisht pa konkurrentë dhe kundërshtarë sepse Basha e Selami janë pjesë e një sinori politik, kur pjesa më e madhe e kryesisë së Partisë Demokratike i janë kundërvënë Lulzim Bashës dhe Eduard Selamit. I vetmi i cili doli si kandidat nga grupi anti-Basha ishte Astrit Patozi, por që u përjashtua nga mbledhja e kryesisë si kandidat i mundshëm për të garuar përballë Eduard Selamit dhe Lulzim Bashës.
‘‘I kërkova kandidatit Lulzim Basha të çlironte PD nga marrja peng e procesit të reflektimit dhe të garës së drejtë brenda nesh. Nuk lëvizi as gishtin për të reaguar, por duket se është shumë i vendosur t’i shkojë deri në fund kësaj maskarade zgjedhore, e cila nisi me shkelje të rënda të librit të rregullave të PD. Ky ishte detyrim i pa negociueshëm që procesi të kthehej në shina statutore. Kjo nuk ndodhi. Bashkë me të edhe të gjitha kërkesat e tjera. Ndaj është fare e qartë për të gjithë, Lulzim Basha ka marrë përsipër nisjen dhe përfundimin e një farse të shëmtuar elektorale, që thellon akoma më shumë përçarjen dhe krizën e thellë të PD’’, shkroi një ditë më parë Astrit Patozi në adresë të Lulzim Bashës dhe njerëzve të tij.
Por, akuzat e Patozit dhe eksponentëve të tjerë të selisë blu janë kaluar në heshtje nga Basha, i cili ka deklaruar se do të flasë vetëm me fillimin e fushatës për kreun e kësaj force politike.
Në aspektin organizativ, fushata do të fokusohet në bashkëbisedimin me strukturat e PD-së në 61 njësitë administrative. Fushata do të ketë në qendër të vëmendjes edhe analizën e humbjes në zgjedhjet e fundit parlamentare si dhe mënyrën sesi do të ringrihet Partia Demokratike për t’u rreshtuar si forca kryesore opozitare përballë mazhorancës njëngjyrëshe të Partisë Socialiste.
‘‘Gara është e rreme. Procesi bëhet antistutor, ai po kërkon të mbajë peng partinë, dhe t’i shmanget dhënies së llogarisë. Ai rrëzoi PD-në , dhe i dha ndihmën më të mëdha Ramës, bashkëpunëtorit të tij të natës. Ringritja e PD nis vetëm me largimin e Bashës. Ai kërkon të manipulojë procesin duke shkelur statusin dhe forumet e PD. Nuk pranon barazi në garë. Nuk pranon rregulla të barabarta, nuk pranon konkurrentë idesh e personalitetesh. Nuk pranon debat. Basha tmerrohet nga forumi se tmerrohet nga e vërteta. Ne kërkojmë një garë të barabartë, rregulla të ndershme, proces të hapur, konkurrencë të vërtetë, ballafaqim e debat. Këto janë kushte të panegociushme,”e akuzoi pak ditë më parë Topalli, Lulzim Bashën.
Po ashtu edhe kandidatin tjetër, Eduard Selamin, Topalli e cilëson si një figurant në krah të Lulzim Bashës, sa për të plotësuar tablonë e fushatës së rremë për kreun e Partisë Demokratike: ‘‘Unë ndjej neveri për atë grup që mbështet Bashën. Ata janë njësoj me ata që nxjerrin partinë mbi Shqipërinë. Në PD nuk ka garë. Selami nuk është kandidat i vërtetë.’’
Basha dhe Selami do të dalin së bashku në këtë fushatë përpara demokratëve për të shpalosur platformat e tyre. E gjithë kjo panoramë politike të kujton garën për kreun e Partisë Socialiste të vitit 2009, kur Edi Rama kishte përballë një kundërshtar fiktiv si Maqo Lakrori. Por, ndryshe nga Lakrori, Selami ka një staturë tjetër politike dhe është një nga themeluesit e Partisë Demokratike, përpos faktit që mund të përfundojë një kandidaturë shtojcë për t’i dhënë idenë demokratëve se Lulzim Basha po zhvillon një garë të barabartë dhe me një kundërshtar përballë.
Zgjedhjet, të cilat do të zhvillohen më datë 22 korrik me parimin ‘‘një anëtar një votë’’ do të jenë përcaktuese për ringritjen e Partisë Demokratike. Komisioni i sapozgjedhur për operacionet elektorale do të marrë përsipër procedurat e votmit, vendvotimet, si dhe kohën e miratimit të listave të votuesve demokratë. Ky komision u ka dhënë të drejtë kandidatëve të kenë nga një përfaqësues në çdo qendër votimi si garanci për mbikëqyrjen e procesit të zgjedhjeve për kryetarin e Partisë Demokratike. Selami dhe Basha futen në një garë ku praktikisht të dy janë i njëjti stof politik, të cilët hija e Berishës i ndjek edhe në rrugëtimin e tyre më të rëndësishëm brenda Partisë Demokratike. (TIRANA TODAY)
