Kreshnik Spahiu iu bashkua protestës së opozitës e cila ngriti çadrën për dy muaj para Kryeministrisë deri në arritjen e marrëveshjes së 18 majit, që i hapi rrugën pjesëmarrjes së opozitës në zgjedhje. Por, ai u zhgënjye shpejt nga Basha, pasi ky i fundit e la jashtë ekipit të tij që synonte të fitonte zgjedhjet.
Pavarësisht faktit se Spahiu e ka kritikuar shpeshherë liderin historik të Partisë Demokratike, Sali Berishën madje duke kërkuar edhe burgosjen e tij, ai iu bashkua protestës së kësaj force politike, por Basha nuk i përmbushi pritshmëritë e tij politike dhe kreu i AK-së u tërhoq përfundimisht nga politika.
Megjithatë, lideri i Aleancës Kuq e Zi, duket ka një lidhje të hershme me eksponentët e Partisë Demokratike, ku një prej tyre është edhe sekretari i Përgjithshëm i kësaj force politike Arben Ristani. Ky i fundit ka dalë hapur kundër Bashës për mënyrën sesi kryetari që ka ngrirë funksionet e tij po vepron në kundërshtim me statutin.
Lidhjen e hershme të Spahiut me PD-në e sjell në vëmendje, ish i përndjekuri politik Augustin Miraka, i cili ka hedhur një foto në profilin e tij në Facebook, ku shfaqen së bashku, Arben Ristani, aktualisht Sekretar i Përgjithshëm i PD, Kreshnik Spahiu kreu i Aleancës Kuq e Zi dhe Çlirim Gjata, ish-kryetar i KQZ-së në ditët e Lëvizjes Studentore të vitit 1990.
‘‘Në foto duket Spahiu me dy gishtat lart, simbol i demokrateve. Të tre personazhet e njohur tani në jetën politike dhe juridike, kanë qenë pjesëmarrës ne lëvizjen studentore dhe grevën e urisë se studenteve për heqjen e emrit Enver Hoxha universitetit politeknik në Tiranë’’, shkruan Miraka.
