Sipas Institutit të Statistikave, indeksi i fondit të pagave pësoi rënie në degën e industrisë, ndërsa regjistroi një rritje të papërfillshme në shërbime. Sektori privat frenoi rritjen e shpenzimeve për paga në tremujorin e parë të vitit.
Mesatarisht, indeksi i fondit të pagave në shërbime u rrit me 0.5%. Disa prej nëndegëve të shërbimeve regjistruan rritje të konsiderueshme, sidomos aktiviteti i agjencive të udhëtimit, me afro 35%.
Por ecuria e përgjithshme e fondit të pagave brenda sektorit u frenua ndjeshëm nga ecuria e tregtisë, që është edhe aktiviteti me peshën më të lartë brenda degës së shërbimeve. Indeksi i fondit të pagave në tregti ra me 2.5% krahasuar me të njëjtën periudhë të një viti më parë.
Për sa i takon industrisë, ecuria e fondit të pagave rezultoi në rënie, me 0.1% krahasuar me një vit më parë. Edhe këtu, ndikimin kryesor në rënie edhe aktiviteti me peshën më të lartë, industria përpunuese. Indeksi i fondit të pagave në tremujorin e parë u tkurr 5.7% me bazë vjetore.
Rënia e industrisë përpunuese, megjithatë, u kompensua pjesërisht nga rritja në industrinë nxjerrëse dhe në energjetikë. Sektori i ndërtimit konfirmoi ecurinë e vet pozitive, edhe për sa i përket pagave. Indeksi i fondit të pagave u zgjerua me afro 10% krahasuar me të njëjtën periudhë të një viti më parë.
Megjithëse ekonomia ndodhet në një rrugë graduale të rimëkëmbjes, ecuria e punësimit dhe pagave në tremujorin e parë të vitit rezultoi zhgënjyese./Scan/
