Fjala e Kryeministrit në takimet intensive elektorale të kësaj të diele, u karakterizua nga mesazhe të forta dhe të drejtpërdrejta ndaj rivalëve të tij politik.
Çjerrjet dhe britmat, siç i cilësoi ai, që po dominojnë ditët e fundit aktivitetet elektorale, sipas Ramës lidhen me frikën që disa kanë filluar të ndjejnë, se mos u cenohen interesat personale.
Me gjuhë kërcënuese, Kryeministri kujtoi se Reforma në Drejtësi tashmë ka hedhur hapin e parë, dhe se falë saj, politikanët nuk do të kenë më mundësinë të dalin heronj nga pallati i drejtësisë. Ai kujtoi se për çerek shekulli nuk është ndaluar asnjë politikan, falë marrëveshjes së heshtur mes politikës dhe gjyqësorit, pakt që ka vdekur një herë e mirë pasi siç tha ai, tani e tutje drejtësia e re do të funksionojë ndryshe.
“Në një çerek shekulli pallati i drejtësisë u pushtua nga gjyqtarë dhe prokurorë të korruptuar që u zgjodhën nga politikanët në bazë të marrëveshjes “unë të zgjodha ty, ti më nxirr hero nga pallati i drejtësisë”, tha Rama.
“Ata që do të dalin të pastër nga filtri i gjykimit të vettingut,do të jenë në pallatin e drejtësisë pa i pasur borxh asnjë politikani”, shtoi ai.
Ai shprehu siguri në fitoren e PS-së në këto zgjedhje por sipas tij, nëse ato do të mbaheshin siç ishin paracaktuar më 18 qershor, në mungesë të opozitës, socialistët të vetëm do të merrnin 100 deputetë.
“Por, -tha Rama, ne zgjodhëm rrugën tjetër, atë të një marrëveshje që është historike, e para që i përfshiu gjithë shqiptarët në një proces demokratik dhe që tregoi se ne të PS-së, kur vjen puna për interesin e Shqipërisë, vëmë Shqipërinë mbi partinë”.
