Kryeministri Edi Rama , njëherësh kryetar i partisë Socialiste, zhvilloi sot një takim me të rinjtë e FRESH-it në teatrin veror në Tiranë, ku përqendroi fjalën e tij në rëndësinë që ka drejtimi i qeverisë i vetëm dhe i pavarur. Ai nënkuptoi se me aleancën e katër viteve më parë PS ra viktimë e vetvetes, kur iu desh t’iu nënshtrohej interesave të të tjerëve.
“Prandaj tha ai, është me rëndësi jetike, fuqizimi i PS-së për të mos qenë më peng i dikujt tjetër në misionin për të bërë shtet. Na duhet një votë për një mandat kuq e zi tha ai.
Arrogancën siç e quajti ai, që po reflektohet javën e fundit të fushatës nga subjektet politike, Rama e motivoi kështu: “Kemi vënë gishtin në një plagë të thellë, pa çlirimin e së cilës nuk ndërtojmë dot shtëpinë e shtetit mbi themelet që kemi hedhur. Po u prishim sistemin, tha ai”.
Në vijim të fjalës së tij, kryesocialisti theksoi se është me shumë rëndësi përpjekja për të hequr dorë nga moda, se të gjithë janë njësoj.
“Të heqin dorë nga moda se të gjithë janë njësoj. Duhet bërë diferenca. Është dekurajuese dhe neveritëse për shoqërinë dhe të ardhmen, moda se të gjithë janë njësoj. Nuk janë të gjithë njësoj, ashtu sikurse Shqipëria nuk është më njësoj me atë të 44 muajve më parë. Në ndryshim nga të tjerët ne kemi atdhedashuri dhe pasion për të bërë shtet, ndërsa të tjerët atdheun e kanë slogan për mundësi përfitimi”, tha Rama.
