Presidenti i Turqisë, Recep Tayyip Erdogan, në intervistën e dhënë për televizionin portugez RTP tha se mënyra e qasjes që Shteteve të Bashkuara të Amerikës kanë ndaj organizatës terroriste PYD është shumë e gabuar, raporton Anadolu Agency.
“Oficerët amerikanë bashkëpunojnë me organizatën terroriste PYD dhe kjo është një zgjidhje e gabuar. Për të ardhur keq, Amerika u ka dhënë arsenale të madha armatimesh”, tha Erdogan.
Presidenti i Turqisë rikujtoi se pavarësisht paralajmërimeve të shumta drejtuar presidentit amerikan Donald Trump gjatë vizitës në SHBA, ata ende nuk e njohin PYD/PKK-në si organizata terroriste dhe së bashku kanë hyrë në Rakka.
“Ne themi hajde i luftojmë së bashku terroristët. Por jo të kemi përkrah një organizatë terroriste? A i ka hije një vendi të fuqishëm si SHBA të veprojnë së bashku me një organizatë terroriste? Për ne, kjo është e papranueshme. Por ata e dinë vetë. Neve s’na ka ngelur gjë tjetër veçse t’i urojmë fat. Sigurisht ia kemi bërë të qartë se nëse ndodh provokimi më i vogël kundër vendit tonë, ne do ta bëjmë atë që është e nevojshme, pa informuar apo biseduar me ndokënd”, theksoi Erdogan.
Presidenti Erdogan në këtë intervistë ka folur edhe për marrëdhëniet e vendit të tij me Bashkimin Evropian.
“Nuk ka vend tjetër që ka pritur kaq gjatë në derën e BE-së. Deri më tani janë hapur 14 kapituj dhe është mbyllur vetëm një. Për fat të keq, kjo metodë e BE-së përdoret vetëm në rastin e Turqisë. Turqia është një vend shumë i suksesshëm e cila ka bërë hapa të rëndësishëm, si në aspektin e kritereve të Kopenhagenit po ashtu edhe në kapitujt e tjerë. Ne u kemi thënë vendeve të BE-së hajde të punojmë dhe t’i zgjidhim shpejtë detyrimet tona”.
Ai theksoi se BE nuk i ka mbajtur premtimet e dhëna, as kur bëhet fjalë për liberalizimin e vizave e as në lidhje me çështjen e refugjatëve.
“Në kampet e refugjatëve në Turqi aktualisht banojnë tre milionë refugjatë nga Siria dhe Iraku. Turqia deri më sot ka ndarë 25 miliardë dollarë për përmbushjen e nevojave të tyre. Për sa i përket kësaj çështjeje, BE-ja nuk e ka mbajtur premtimin e dhënë Turqisë. Ata premtuan se deri në korrik të vitit 2016 për refugjatët do të ndanin tre miliardë dollarë, dhe deri në fund të vitit 2016 edhe tre miliardë të tjera. Shuma që kanë ndarë deri më tani është vetëm 725 milionë euro”, nënvizoi Erdoğan.
I pyetur në lidhje me deklaratën e presidentit amerikan Trump se “Irani destabilizon Lindjen e Mesme”, Erdogan tha: “Ne duhet të ulemi në tryezë dhe të gjejmë zgjidhjen më të mirë për çështjen siriane dhe irakiane. Është e pamundur që pa Iranin të zgjidhet çështja e Irakut. Në negociatat duhet të jetë dhe Irani. Kur është fjala për Sirinë, mungesa e Iranit nuk do të sillte përfitime sepse Irani është duke bashkëpunuar me regjimin. Siria dhe Iraku janë fusha ku është i pranishëm ekspansionizmi sektar iranian, por atë ekspansionizmin sektar, unë e shoh si ekspansionizëm persian dhe më duhet të theksoj se jam kundër saj”, tha presidenti turk.
Duke folur për terrorizmin, Erdogan tha se organizatat terroriste nuk kanë asgjë të përbashkët me Islamin. “ISIS është sigurisht një organizatë terroriste dhe nuk ka të bëjë me Islamin. Al-Kaeda gjithashtu. Rajoni aktualisht është i mbushur me organizata terroriste. Ne si muslimanë jemi kundër të gjitha formave të terrorizmit. Kjo është arsyeja pse ne jemi kundër çdo krahasimi të një muslimani të sinqertë me ndonjë terrorist. Në Evropën e viteve të fundit po artikulohet termi ‘terrorizëm islamik’, të cilin ne nuk mund ta pranojmë si të tillë. Askush nuk ka të drejtë të përdorë këtë term, sepse Islami në rrënjën e fjalës së tij ka paqen, kjo është Fe e paqes”, është shprehur Erdogan.
