“Administrata e shtetit nuk do të jetë më tepsi pushteti për tu ndarë mes partive”. Kështu u deklarua kryeministri Edi Rama, gjatë një takimi elektoral në Rrogozhinë.
Edhe pse prej katër vitesh në krye të kësaj administrate, Rama bëri thirrje “për të ngritur krye ndaj administratës së kalbur që partitë e kanë kthyer në tepsi për ndarje të pushtetit”, duke premtuar se nuk do ta lejonte përsëritjen e fenomenit.
Ai e cilësoi këtë një sistem kanceroz, të kalbur nga brenda, me nëpunës që kanë ardhur në zyrë duke ia dhënë votën njërës apo tjetrës parti, jo duke e fituar atë vend punë me aftësi.
Kryeministri tha se njerëzit e shkolluar e të formuar do të kenë mundësinë të jenë në zyrat e shtetit, duke i shpëtuar këto të fundit një herë e mirë nga uzurpimi klientelist i pative.
