INSTAT raporton se çmimet e konsumit në muajin maj të këtij viti u rritën me 2 % , ndërsa ndikimin kryesor e ka dhënë grupi “ushqime dhe pije joalkoolike” me +1,42 pikë përqindje.
Referuar raportit mujor të INSTAT-it për çmimet e konsumit, grupi “qira, ujë, lëndë djegëse dhe energji” ka kontribuar me +0,18 pikë përqindje, ndërsa çmimet e grupit “Transporti” kanë kontribuar me +0,16 pikë përqindje. Çmimet e grupit “argëtim e kulturë”, sipas INSTAT-it kanë kontribuar me +0,06 pikë përqindje.
Çmimet e grupit “pije alkoolike dhe duhan” kontribuan me +0,04 pikë përqindje dhe çmimet e grupit “shërbimi arsimor” kontribuan me +0,03 pikë përqindje. Çmimet e grupit “Komunikimi” kanë kontribuar me +0,02 pikë përqindje. Çmimet e grupit “Veshje dhe këpucë” kanë kontribuar me -0,08 pikë përqindje dhe çmimet e grupit “Mobilje, paisje shtëpie dhe mirëmbajtje” kanë kontribuar me -0,02 pikë përqindje.
Krahasuar me muajin maj 2016, rritja më e madhe e çmimeve vërehet në grupin “Ushqime dhe pije joalkoolike” me 3,8 %, pasuar nga grupet “mallra dhe shërbime të ndryshme” me 3,0 %, “transporti” me 2,6 %, “argëtim dhe kulturë” me 2,0 %, “qira, ujë, lëndë djegëse dhe energji” me 0,9 %, “pije alkoolike dhe duhan” me 0,8 %, etj.
INSTAT bën të ditur se ndryshimi mujor i indeksit është -1,2 %. Krahasuar me muajin prill 2017 ulja më e madhe mujore e çmimeve vërehet në grupin “ushqime dhe pije joalkoolike” me 2,7 %, pasuar nga grupet “argëtim dhe kulturë” me 2,4 %, “transporti” me 0,7 %, etj. Rritja më e madhe mujore e çmimeve vërehet në grupin “veshje dhe këpucë” me 0,3 %.
