Zyra Evropiane Kundër Mashtrimit, OLAF, ka hedhur poshtë pretendimin se ky institucion ka filluar një proces hetimor ndaj ambasadores së Bashkimit Evropian në Shqipëri, Romana Vlahutin.
Në lajmin e botuar fillimisht në portalin “New Europe”, pretendohej se OLAF kishte nisur një hetim ndaj Vlahutin për abuzime me fondet e BE-së në blerjen e vilës 1.6 milionë euro në një qendër rezidenciale, në periferi të Tiranës.
“Ambasadorja e Bashkimit Evropian në Shqipëri, Romana Vlahutin ndodhet nën hetimin e OLAF për blerjen e një vile prej 350 metra katrorë në Tiranë, me vlerë 1,6 milionë euro. Kjo është një çmenduri, pasi sipas ekspertëve, rezidenca nuk vlen as sa një e treta e çmimit të shitjes. Në kohën e shitjes, rezidenca të ngjashme dhe në përmasa më të mëdha arrinin në 1 milion euro, më shumë nga sa ka paguar Komisioni Evropian.
Ky hetim ka një rëndësi të veçantë sepse ka nisur pak javë përpara zgjedhjeve të përgjithshme të 25 qershorit. Në më shumë se një rast, Vlahutin ka mbështetur haptazi socialistët që janë në pushtet, veçanërisht kryeministrin shqiptar, Edi Rama. Megjithatë, fakti që ambasadorja e BE-së, është kaq miqësore ndaj Ramës, vendosja e saj nën hetim përpara zgjedhjeve, nisur edhe nga rrethanat, mund të lërë keqkuptime të tilla, sikur Komisioni Evropian po merr anë në procesin zgjedhor. Megjithatë, i preferuari i ambasadores ka shumë pak shanse që të fitojë zgjedhjet parlamentare- dhe askush nuk do të donte të kishte të bënte me një humbës, aq më tepër Komisioni Evropian”, shkruan “New Europe”, me autor “Kasandra”. Lajmi i botuar në “New Europe”
https://www.neweurope.eu/article/vlachudin-under-investigation/
Duke marrë në konsideratë domosdoshmërinë e burimit të këtij lajmi, “Tirana Today” pyeti përmes emailit zyrën e OLAF, nëse kishte nisur vërtet një hetim ndaj ambasadores Vlahutin.
Në përgjigjen e saj, Zyra Evropiane Kundër Mashtrimit pranë Komisionit Evropian, hodhi poshtë një pretendim të tillë. Sipas saj, OLAF ka bërë një analizë mbi atë se çfarë është shkruar rreth ambasadores Vlahutin por, nuk ka gjetur asnjë indice për të nisur hetimet ndaj saj.
“OLAF bëri një analizë paraprake lidhur me informacionin e vendosur në dispozicion për blerjen e një vile në Tiranë nga delegacioni i Bashkimit Evropian në Shqipëri. Pas kësaj analize, zyra vendosi të mos nisë hetimet pasi gjykoi se nuk kishte dyshime për mashtrim apo parregullsi që mund të justifikonin hapjen e një hetimi. Megjithatë, nëse OLAF do të vihet në dijeni të informacioneve të reja, që mund të jenë me interes të madh për kryerjen e hetimeve, atëherë ato do të analizohen nga zyra në çdo kohë”, shkruan OLAF në përgjigjen dërguar redaksisë së “Tirana Today.”
(TIRANA TODAY)
