Grupi i kritikëve të Lulzim Bashës në Partinë Demokratike është përçarë. Disa prej tyre nuk ndajnë të njëjtin mendim për shkarkimin e kreut të kësaj force politike. Qëndrimit të Patozit, i është bashkuar së fundmi edhe Majlinda Bregu.
Pavarësisht se Bregu është një nga zërat më të fortë ndaj Bashës, ajo është shprehur kundër Topallit dhe Imamit për shkarkimin e kreut të Partisë Demokratike.
Bregu gjykon se tani është koha për të zhvilluar fushatën elektorale me synimin që PD të fitojë zgjedhjet e 25 qershorit. Në një intervistë të shkurtër për Vizion Plus, Bregu vë në dukje se
Zonja Bregu, ju u takuat dje me Zonjën Topalli, por a e mbështesni ju idenë e saj për shkarkimin e zotit Basha, para 25 qershorit?
Nuk është hera e parë që flas për forumet dhe as për statutin e Partisë Demokratike, i cili në fakt ka një të vërtetë dhe ky është fakt tashmë, të cilën e kemi diskutuar dje dhe në një kafe shumë miqësore me miq që statuti nuk është respektuar dhe është shkelur. Megjithatë mua më intereson më shumë sot, dhe besoj të gjithë ne së bashku na intereson Partia Demokratike. Na intereson që Partia Demokratike të vazhdojë të jetë e fortë, Partia Demokratike të maksimalizojë rezultatin e saj në zgjedhjet e qershorit dhe njëkohësisht ajo për të cilën besoj ka interes çdo demokrat i vërtetë është që Partia Demokratike si shtëpia e madhe e lirisë së shqiptarëve të vazhdojë të jetë po aq e fortë sa ka qenë dhe jo të ekzistojë si gjallesë fantazëm e republikës së re. Kjo është më e rëndësishme për ne, dhe të siguroj që si unë edhe të gjithë kolegët që kemi takuar dje nuk kemi asnjë interes tjetër primar përveç interesit për të punuar me të gjitha mundësitë që do kemi në këtë fushatë pro Partisë Demokratike.
Cila do të jetë analiza pas zgjedhjeve për kryetarin e PD-së?
Është shumë mirë që ka një zgjim më të madh sot të të gjithë demokratëve për të kuptuar dhe për të adresuar problemin atje ku realisht ka qenë gjatë gjithë kësaj kohe. Unë vazhdoj të besoj që Partia Demokratike është e të gjithëve, nuk është parti as e kryetarit aktual dhe s’mund të jetë kurrë parti vetëm e Njëshit.
Një ditë më parë Jozefina Topalli dhe Arben Imami u bënë thirrje strukturave të Partisë Demokratike që t’i bashkohen iniciativës për shkarkimin e Lulzim Bashës si mënyra e vetme për të ndalur shkatërrimin e PD-së; por ky aksion politik duket se nuk është mbështetur as nga Bregu e as nga Patozi.
