Kreu i Shtetit, Bujar Nishani ka reaguar lidhur me incidentin e djeshëm, ku dhjetëra demokratë, mes tyre edhe Lulzim Basha, përfunduan në spital.
Presidenti shprehu shqetësimin e tij lidhur me ngjarjen, ndërsa thekson se duhet treguar angazhim maksimal për normalizimin e situatës.
Gjithashtu, Nishani u uron shërim të shpejtë të lënduarve, ndërsa shton se kërkon angazhimin maksimal të institucioneve ligjzbatuese në zbulimin e plotë të ngjarjes.
DEKLARATA E PLOTË:
Presidenti i Republikës, Sh.T.Z. Bujar Nishani po ndjek me shqetësim dhe angazhim maksimal situatën e rëndë që ka shkaktuar lëndimin e një numri të madh qytetarësh përfshirë edhe liderin e opozitës, z. Lulzim Basha, gjatë tubimit të çeljes së fushatës elektorale të opozitës ditën e djeshme në Bulevardin “Dëshmorët e Kombit”.
Presidenti i Republikës uron së pari shërimin sa më parë të të lënduarve dhe tejkalimin e kësaj situate pa pasoja.
Presidenti po mban kontakte me të gjitha agjencitë ligjzbatuese për t’u informuar për zhvillimin e kësaj ngjarjeje si dhe kërkon angazhimin maksimal të tyre në zbulimin e plotë të saj.
