Vetëm pak orë nga nisja e muajit të Ramazanit, është rrënuar një xhami shqiptare në Beograd. Bëhet fjalë për xhaminë që ndodhet në Zemun, afër Beogradit, e cila është rrënuar nga përfaqësues komunale të Komunës së Zemunit të përkrahur nga xhandarmëria.
Mësohet se aksioni ka nisur tri orë para mëngjesit të ditës së sotme, ndërsa lajmi është konfirmuar edhe nga kryetari i Asamblesë së Përgjithshëm të Bashkësisë Islame të Serbisë, Muhamed Jusufspahic.
Ky i fundit tha se zonat përreth xhamisë në Zemun ishin të rrethuara me dhjetë autobusë me forca policie, kurse, si kundërpërgjigje thirrjet e qytetarëve ishin: “Edhe kur jemi djegur kemi qenë më të fortë”.
Prishja e xhamisë është justifikuar me pretendimin se ajo kishte nisur të ndërtohet pa leje.
Imami i xhamisë kishte paralajmëruar dje se kundër këtij vendimi do të dalin në protestë qytetarët shqiptarë që jetojnë në rrethinë në mënyrë që të pengojnë rrënimin e saj nga autoritetet serbe.
Pas rrënimit të xhamisë në Zemun, ka reaguar imami i saj, Emin Zejnullahu. Ai ka thënë se kanë pasur një marrëveshje me autoritetet komunale atje, që objekti fetar të mos prishet:
“Dje kemi dalë në terren për ta kundërshtuar rrënimin dhe kemi rënë dakord që objekti të mos rrënohet, pasi është në proces të legalizimit.
Autoritetet nuk e kanë respektuar marrëveshjen dhe rreth mes orës tre dhe katër të mëngjesit me një ekskavator kanë ardhur dhe kanë prishur një pjesë të kulmit dhe një kat të xhamisë”, ka shtuar ai.
