Vetëm një ditë pasi erdhi në krye të ministrisë së Brendshme, Dritan Demiraj u bëri të qartë strukturave të Policisë së Shtetit, pozicionin që duhet të mbajnë në raport me procesin e pritshëm zgjedhor, sikurse u bëri të ditura pasojat nëse nuk do të respektohej me përpikmëri misioni kushtetues i Policisë së Shtetit.
Në takimin e parë që zhvilloi me drejtuesit kryesor të rendit, Demiraj përcolli direktivat afatshkurtra që kanë të bëjnë me procesin zgjedhor.
“Garantimi i një procesi zgjedhor me standarde të larta profesionale nga ana e Policisë së Shtetit, mospërfshirja në aktivitetet e partive politike dhe fushatën zgjedhore si një prioritet madhor dhe përkushtimi i çdo strukture policore në të gjithë Shqipërinë, për të zbatuar me përpikëri misionin kushtetues”, ishin direktivat e para të ministrit të ri.
Ai nuk nguroi t’u flasë vartësve të tij edhe për përgjegjësitë, deri edhe penale që i prisnin në rast mosrespektimi të këtyre direktivave.
“Shpërdorimi i autoritetit policor për të influencuar në mbështetjen e një partie politike, është vepër penale dhe dënohet me burgim”, u kujtoi ai.
Demiraj kërkoi edhe ashpërsimin e luftës kundër cannabisit në çdo pjesë të territorit të Republikës së Shqipërisë.
“Kontrolli i territorit është detyrë që çdo individ me uniformë policore duhet të angazhohet maksimalisht. Çdo tolerim ndaj këtij fenomeni do të penalizohet rreptësisht. I gjithë zinxhiri drejtues i policisë së shtetit do të mbajë përgjegjësi sipas përcaktimeve të ligjit”, theksoi ministri.
