Kuvendi miratoi në mbrëmjen e sotme ngritjen e komisioneve ad-hoc të Vettingut pjesë e reformës në drejtësi.
Emrat e anëtarëve të opozitës në komisionet e Vettingut për verifikimin e pastërtisë së figurës së gjyqtarëve dhe prokurorëve janë Oerd Bylykbashi, Eduard Halimi, Aldo Bumçi dhe Fatmir Mediu.
Gjithashtu janë propozuar edhe Flamur Noka, Dhurata Çupi, Gent Strazimiri, Jorida Tabaku, Helidon Bushati, Luçiano Boçi e Albana Vokshi.
Më parë Kuvendi kishte miratuar anëtarët e tjerë të këtij komisioni si Ulsi Manja, Bashkim Fino, Pandeli Majko, Evis Kushi, Vasilika Hysi, Ervin Bushati dhe Luan Rama. Dy komisionet do të kenë 12 anëtarë, 6 anëtarë nga mazhoranca dhe 6 nga opozita, si dhe kryetarët respektivë të tyre.
Në këtë seancë të jashtëzakonshme u betua edhe kryetari i ri i Komisionit Qendror të Zgjedhjeve, Klement Zguri.
Kuvendi votoi gjithashtu, edhe për Avokaten e re të Popullit, e cila do të jetë Erinda Ballanca. Ndërsa më pas deputetët kaluan me kartonët e tyre edhe ligjin për median audiovizive.
