Lulzim Basha po mban një fjalim në “Çadrën e lirisë”, ku ka akuzuar kryeministrin se i sheh njerëzit si gurë shahu. Gjithashtu, kreu i PD-së shtoi se popullin do ia tregojë “qejfin” Ramës më 18 qershor.
FJALIMI I BASHËS:
Mirë se vini në ditën e dytë të Republikës së Re që e shpallëm njëzëri. Dita e sotme sjell bashkë të rinj dhe të reja, të moshuar, intelektualë, artistë, disa emocionohen kur flasin këtu, por ky nuk është asnjë problem.
Çfarë flitet këtu as nuk censurohet, as nuk sponsorizohet, as nuk shtrembërohet. Kjo është Shqipëria e vërtetë, me halle e probleme nga qeveria e bërë njësh me krimin dhe drogën.
Qeveria e Ramës ka në plan të kapë zgjedhjet e ardhshme. E dëgjuat dje kur tha se parlamenti do të jetë më i mirë pa PD-në se do ketë më me pak sherre?
Parlamenti pa sherr ka qenë në komunizëm, sepse internimi, dajaku, burgosja ishte në rend të ditës. Sa më pak sherr në parlament, aq më shumë shtypet dhe vidhet populli. Ky është një mësim i patjetërsueshëm i historisë.
Prandaj le t’i themi dhe ta harrojë se do të ketë një parlament të drejtuar nga droga dhe krimi sepse ky binom, parlament pa zë, pa opozitë dhe një popull i shtypur nuk ka për të ndodhur.
Nuk ke për të gëzuar as edhe një orë të vetme. Thirri mendjes kur artikulon ëndrra diktatoriale, përndryshe të vjen fundi i diktatorit.
Këto halle, Rama i konsideron një lojë pokeri, një lojë shahu. Këto halle nuk i sheh, ai sheh vetëm pasurimin e tij.
Ai i sheh njerëzit si gur shahu! Republika e Re nuk është lojë.
Ai e sheh si lojë shahu sepse për të njerëzit janë statistika, janë gurë shahu, janë shifra.
Do ia gatisë populli qejfin me 18 qershor! Afati i regjistrimit ka kaluar, 18 qershori është i rrëzuar ligjërisht. / TIRANA TODAY
