Kryetari i Frymës së Re Demokratike, Bamir Topi, ka qenë kritik ndaj situatës politike aktuale në fjalimin që mbajti për 5-vjetorin e krijimit të partisë që drejton.
Topi i kujton shqiptarëve se ai e ka paralajmëruar që në vitin 2008, krizën aktuale politike. “PD e di që është përgjegjëse për këtë situatë të krijuar, Basha nuk bëri asnjë përpjekje për t’u shkëputur nga shefi i tij dhe duket qartë se ata të dy kanë pësuar metamorfozë”, thotë Topi.
Në komentet për presidentin, Topi deklaroi se nuk i intereson mënyra si u zgjodh presidenti, por stabiliteti i vendit. “I lumtur që kemi president të ri dhe i uroj suksese, FRD-ja respekton atë që është kushtetuese”.
Në 5-vjetorin e krijimit të partisë, Topi tha se e gjeti FRD-në të krijuar dhe e ftuan për ta drejtuar atë. “Unë do jem në krye të fushatës në çdo qytet për të respektuar çdo qytetar që është përkrahës i FRD-së”, tha Topi, duke mos i dhënë rëndësi kandidimit të tij personal në lista për zgjedhjet e 18 qershorit.
