Pavarësisht zhvillimit të jashtëzakonshëm shkencor dhe teknologjik, mbi 1 miliardë njerëz sot në botë vuajnë ende nga uria. Pse ndodh kjo? Si pasojë e shpërdorimeve të mëdha. Nga rreth 4 miliardë tonë ushqime që prodhohen në vit, shpërdorohen më shumë se një e treta e tyre.
Kjo do të ishte e mjaftueshme për të ushqyer jo 1, por 2 miliardë njerëz. Në krye të shpërdorimit të ushqimeve në tryezën e ngrënies janë vendet evropiane dhe SHBA-ja. Ndërkohë humbjet më të mëdha që në fazën e vjeljes, ndodhin në vendet e varfra.
Shqipëria renditet nga shumë raporte e fundit në rajon dhe Evropë, për nivelin e ushqyeshmërisë. Të dhënat zyrtare, flasin për 83 mijë familje që jetojnë në mjerim të plotë. Edhe në vendin tone, shpërdorimet e ushqimeve janë në masën 30-40 për qind.
Disa vende në Evropë, kanë miratuar së fundmi ligje që i nxisin prodhuesit t’i falin për bamirësi prodhimet apo produktet e pashitura. Në Shqipëri, kjo praktikë ka filluar vetëm si nismë e shoqërisë civile, sikurse është “Fundjava Ndryshe”, për të shpëtuar mijëra njerëz nga uria.
