Të gjithë studentët të cilët kanë dëshirë që të aplikojnë për t’u punësuar pranë administratës publike, kanë në dispozicion edhe 1 javë kohë. Punetembare.al është portal i vënë në dispozicion për të gjithë studentët, të cilët dëshirojnë që të punësohen në administratë.

Qeveria ka vendosur datën 27 janar si afatin e fundit për aplikim, duke ofruar për këtë vit 803 vende pune në total pranë administratës publike për studentët të  cilët janë ekselentë. 601 studentë pritet të punësohen në shërbimin civil, dhe 202 punësime të tjera me kod pune.

Kriteret

Të rinjtë të cilët do të aplikojnë këtë vit, do të rekrutohen pa kaluar në proceset e konkurrimit. Ata do të kenë mundësinë e përzgjedhjes për vendet e punës dhe ky proces do të varet nga mesatarja e gjithsecilit. Numri më i lartë i punësimeve ofrohet kryesisht në sektorin doganor, në degë të ndryshme në vend, në Sektorin e Monitorimit të Kompetencave Vendore dhe Funksioneve të Deleguara në disa qarqe, si edhe në Sektorin e Kontrollit në Pikat e Inspektimit Kufitar në shërbimin veterinar etj.