Presidenti i Turqisë, Recep Tayyip Erdogan, ka refuzuar të ulet në të njëjtën tavolinë ku po drekonte presidenti i SHBA-së, Donald Trump.
Sipas mediave turke, arsyeja e refuzimit të tij ishte se bashkë me Trump në tavolinë ndodhej edhe udhëheqësi i grushtit të shtetit të Egjiptit, Abdelfettah el-Sissi. Kështu, Erdogan dhe delegacioni i tij janë kthyer mbrapsht dhe janë ulur në një tryezë tjetër.
Donald Trump tronditi audiencën kur para ca kohësh e cilësoi el-Sissi si “diktatorin e tij të preferuar”. Nga ana tjetër, Erdogan i ka kërkuar më parë OKB-së të fillojë një hetim zyrtar mbi vdekjen e Presidentit të parë të Egjiptit, Mohamed Morsi.
“Ata nuk bënë ndërhyrjen më të vogël pasi presidenti i parë i vendit i zgjedhur në mënyrë demokratike vuajti për më shumë se 20 minuta. Ata nuk ia dorëzuan eshtrat e tij familjes së tij…”, ka thënë Erdogan, duke fajësuar Abdel Fattah el-Sissi për vdekjen e Morsi.
