Gjatë mbylljes së bilancit për vitin 2020, bordi i drejtorëve të Romës njoftoi se ata nuk do të shkojnë më përpara me projektin për të ndërtuar një stadium të ri në zonën e Tor di Valle, i cili u ndoq nga pronësia e mëparshme, pasi ekzekutimi i tij ishte konsideruar i pamundur.
Plani prej 800 milionë eurosh i ideuar nga Xhejms Palota, për ndërtimin e një arene prej 50 mijë vendesh, paraqiti infrastrukturat përkatëse, duke përfshirë një stacion të ri treni dhe një autostradë të re, ambiente tregtare, hotele dhe apartamente.
Projekti filloi tetë vjet më parë por u vonua vazhdimisht për të përmbushur kërkesat e administratës lokale, e cila fillimisht ishte rezistente, për të adresuar rrezikun hidrologjik të vendit dhe për shkak të kufizimeve të një ndërtese të vjetër që supozohej të rrënohej.
Për më tepër, ndërtuesi që zotëronte pasurinë e paluajtshme u arrestua me akuza korrupsioni. Në fund të fundit problemet ligjore u konsideruan shumë të vështira për t’u kapërcyer dhe fillimi i zbatimit të projektit në një periudhë të pranueshme kohore u bë i pamundur. Bordi i Romës gjithashtu bëri me dije se klubi ka pësuar një humbje prej 75 milion euro, vitin e kaluar.
