Emisioni investigativ “BOOM” në RTV Ora ka zbardhur shkeljet e Bashkisë Gramsh, në tenderin për rikonstruksionin e rrugës nga fshati Shemrizë deri tek ura e Skënderbegasit, i cili i ka kushtuar buxhetit të shtetit rreth 700 milion lekë.
Edhe pse ligji për prokurimin publik përcakton qartë se kriteret në lidhje me firmat pjesëmarrëse duhet të jenë në përpjesëtim me natyrën dhe përmasat e kontratës që do të prokurohet dhe jodiskriminuese, Bashkia Gramsh nuk e ka zbatuar atë, duke paracaktuar kështu edhe fituesin e tenderit.
Tenderi për ndërtimin e kësaj rruge u fitua nga bashkimi i operatorëve BAJRAMI-N & Meteo SHPK me çmimin më të lartë, por pavarësisht kësaj cilësia e punimeve ka qenë e dobët, kjo pasi rruga ka dëmtime të shumta ende pa kaluar dy vjet nga ndërtimi i saj.
E pyetur në lidhje me kriteret diskriminuese në këtë tender, Bashkia Gramsh nuk dha asnjë koment. Ndërsa sa i përket prishjes së rrugës, drejtori i Infrastrukturës pranoi se rruga u dëmtua brenda vitit.
Banorët e fshatit Skënderbegas hodhën akuza edhe në drejtim të kryebashkiakes Dollani, e cila sipas tyre ka premtuar se kjo rrugë do të shkonte edhe në fshatin e tyre, por që sipas tyre rezulton një premtim i pambajtur.
