Kreu i Partisë Demokratike, Lulzim Basha ka nderuar sot kujtimin e grupit të deputetëve të ekzekutuar 70 vjet më parë.
Gjatë fjalës së tij, Basha tha se eliminimi i deputetëve të opozitës ishte varrosja e çdo lloj mendimi politik.
Basha tha se ndihet i turpëruar që ai dhe Partia Demokratike nuk kanë bërë më shumë për të dënuar krimet e komunizmit.
Nga ana tjetër, kreu i PD-së deklaroi se ndihet i turpëruar që Kuvendi drejtohet nga një nga personat e klikës kriminale të komunizmit, duke iu referuar Gramoz Ruçit.
FJALA E BASHËS:
Para 70 vitesh, deputetët u dënuan me gjyqe farsë, të montuara nga kriminalë, u vranë në emër të popullit. Eleminimi i deputetëve opozitarë varrosi çdo lloj lirie mendimi politik. Në Shqipëri kishte vetëm një zë: enverizëm. Të gjitha institucionet politike dhe shoqërore të vendit, dhe media ishin thjesht instrumente të sundimit të Enver Hoxhës dhe rrethit të tij të ngushtë përmes propagandës, manipulimit dhe terrorit.
Komunizmi nuk ishte zgjedhje e lirë e popullit shqiptar, por një regjim që iu imponua popullit me dhunë e me gjak.
Pushteti i Enver Hoxhës ishte një pushtet personal dhe gjakatar, dhuna e tij nuk kurseu askënd, as ata që luftuan me ndershmëri dhe idealizëm.
Sot unë ndjej dhimbje sepse e di që ceremonia sot dhe fjala janë për shumë shqiptarë hera e parë që dëgjojnë konkretisht për krimet e komunizmit. Sot unë ndjehem fajtor si deputet, si politikan, si qytetar, që ne kemi lënë pa bërë shumëçka për të dënuar krimet e komunizmit, për të penguar autorët e krimit të komunizmit të mos ndikojnë më në jetën politike.
Ndjehem i turpëruar që jam pjesë e kuvendit që drejtohet nga njëri prej atyre që ishin pjesë e asaj klike kriminale që vrau.
Ndjehem i trishtuar që ky vend vijon të ketë në krye të inat njerëz të mësuar nga diktatura e Enver Hoxhës.
Ky është dështim, dështimi ynë i gjithë shoqërisë, i politikës./ Tirana Today
