Një anije e braktisur prej kohësh u gjet në brigjet e ishullit japonez Sado këtë të premte.
Sipas mediave vendase, pas kontrollit të ushtruar në anije u gjetën dy koka të dekompozuara dhe 7 trupa. Varka ishte afërsisht 7,6 metra e gjatë, 4,3 metra e gjerë dhe 2 metra e lartë ndërsa trupat e zbuluar ishin dekompozuar.
“5 nga trupat u identifikuan si meshkuj por dy të tjerët nuk mund të identifikoheshin. Ka pasur edhe raste të tjera të ngjashme por ky ishte zbulimi i parë i trupave të pajetë në një anije kaq të prishur, në këtë ishull për këtë vit”, thanë autoritetet zyrtare.
Mediat lokale thanë se policia japoneze dhe roja bregdetare po hetojnë rastin, teksa dyshojnë se anija është nisur nga Koreja e Veriut.
Gazeta japoneze “Yomiuri Shimbun” raporton se të paktën 156 anije peshkimi të dyshuara si të Koresë së Veriut janë gjetur duke lëvizur në ujërat japoneze gjatë vitit 2019.
Ekspertët thonë se disa peshkatarë të Koresë së Veriut po udhëtojnë larg në det, në mënyrë që të plotësojnë pritshmëritë e qeverisë për kapjet më të mëdha. Por anijet e tyre të vjetra dhe të pajisura dobët janë të prirura të kenë probleme mekanike apo t’iu mbarojë shpejt karburanti.
