Pas fazës së regjistrimit të 7 kandidatëve për kryeprokuror të përkohshëm, tashmë është radha e një tjetër faze.
Ditën e sotme, në orën 15:00 do të zhvillohet seanca dëgjimore në Komisionin e Ligjeve.
Në garën për kryeprokuror marrin pjesë prokurori i Durrësit Ferdinand Elezi, Arta Marku, prokurorja nga Shkodra, Besnik Muçi, Arqile Koça, Granit Shahu, Ermira Tafani si dhe Artur Selmani.
Por, duket se në seancën e sotme do të mungojnë deputetët e Partisë Demokratike. Këta të fundit kanë kundërshtuar në mënyrë të prerë zgjedhjen e një prokurori të përgjithshëm të përkohshëm, duke e cilësuar këtë si të jashtëligjshme, ndryshe nga mazhoranca, ambasadori Lu, por edhe ambasadorja Vlahutin.
Sipas Bashës, zgjedhja e një prokurori të përgjithshëm të përkohshëm do të thotë kapja e tij nga kryeministri Rama, prandaj ai refuzoi edhe ftesat e njëpasnjëshme të kreut të qeverisë për bashkëpunim.
