Biznesmenit Arbër Çekaj i është komunikuar këtë të shtunë në Gjykatën e Krimeve të Rënda masa e sigurisë “arrest me burg”. Një masë e marrë ndaj tij në mungesë. Ndërkohë, avokati Maks Haxhia ka kërkuar revokim mase dhe ndryshimin e saj në një masë më të butë. Sipas tij, Arbër Çekaj ka patur vetëm bananet, ndërsa pronari i kontenierit ka qenë tjetër person dhe ai duhet hetuar. Arbër Çekaj sipas avokatit nuk ka lidhje me këtë ngjarje.
Dy ditë më parë, Çekaj u ekstradua nga Gjermania, pas ndalimit atje, për llogari të autoriteteve shqiptare. Në shtetin gjerman ai zhvilloi një betejë të gjatë gjyqësore me autoritetet vendase. Betejë të cilën pritet të nisë javën e ardhshme me autoritetet shqiptare. Do të jetë një betejë e gjatë, pasi ai është dyshuar edhe më parë për trafik droge, për një sasi të kapur në Ekuador.
Çekaj është pronari i firmës “Arbi Garden”, që porositi ngarkesën me banane ku gjetën rreth 613 kg kokainë. Sasia e drogës, më e madhja ndonjëherë e sekuestruar në vend, u kap në mars të vitit 2018.
Arbër Çekaj akuzohet nga Prokuroria për Krime të Rënda për trafik të lëndëve narkotike. Në pranga për ngarkesën e drogës është menaxheri i biznesit Donald Lushaj dhe Armando Pezaku, shoferi i kamionit që transportoi kontenierët me banane dhe kokainë drejt magazinave të “Arbri Garden” në Maminas ku ndërhyri policia, duke sekuestruar drogën.
