Banka “Credit Swisse” ka publikuar një raport ku tregon se pasuria për çdo të rritur shqiptar në mesin e vitit 2017 ishte 11.061 dollarë. Në raportin “Të dhënat për pasurinë globale 2017”, jepen të detajuara shifrat për pasurinë e të rriturve në vendet e të gjithë botës.
“Nga shuma prej 11,061 dollarë, 2012 dollarë është pasuri financiare dhe 9801 dollarë është pasuri jo financiare. Në krahasim me një vit më parë, kur ishte 9,997 dollarë, pasuria rezulton në rritje me 10.6%, por këtu është dhe efekti i kursit, teksa dollari është zhvlerësuar ndaj lekut këtë vit”, thuhet në raportin e “Credit Swisse”.
Në mesin e vitit 2017, pasuria totale e shqiptarëve ishte 24 miliardë lekë. Ndërkohë nga shpërndarja e të ardhurave rezulton se për Shqipërinë, 59.3 për qind e personave kanë një pasuri nën 10 milionë dollarë. Pjesa tjetër prej 40.3% e popullsisë ka një pasuri midis 10 deri në 100 mijë euro.
“Por sa milionerë ka Shqipëria? Sipas raportit të “Credit Swisse”, vetëm 0.3% e popullsisë ka një pasuri mbi 100 mijë dollarë. Në vlerë absolute, me numrin e të rriturve, që sipas raportit është rreth 2.2 milionë persona, në Shqipëri ka vetëm rreth 6500 persona që kanë një pasuri mbi 100 mijë dollarë deri në 1 milionë dollarë. Ndërsa raporti thotë se në Shqipëri nuk ka asnjë person që ka mbi një milionë dollarë pasuri, teksa kjo përqindje është zero (shiko tabelën në fund)”, shkruan “monitor”.
Ndërsa kanë një pasuri prej rreth 11 mijë dollarësh, çdo i rritur shqiptar ka një borxh prej 752 dollarësh, deri në mesin e vitit 2017, nga 680 dollarë që ishte borxhi mesatar një vit më parë.
