Ansi Agolli është shpallur sërish kampion i Azerbajxhanit me ekipin e tij Qarabag, për të pestën herë pas 8 viteve që nisi aventurën azere. Mbrojtësi shqiptarë ka fituar një rol mjaft të rëndësishëm në ekip, duke u aktivizuar si titullar në të gjitha ndeshjen. Ky mund të cilësohet edhe si viti më i suksesshëm i Qarabagut, pasi arritën në fazën e grupeve në Champions League.
Edhe pse Agolli aktivizohet rregullisht dhe merr pjesë në kompeticionin më të madh të futbollit për klube, Panucci nuk është i bindur që ai mund të japë akoma për kombëtaren pasi mosha e tij shkoi 36 vjeç.
“Ka qenë një vit i gjatë, pavarësisht se në fillim është dukur sikur e kemi pasur të lehtë. Pas ndeshjes kemi pasur një moment festimi, pasi kemi arritur matematikisht fitimin e titullit. Megjithatë duhet të respektojmë kampionatin edhe për këto 4 takime të mbetura. Klubi nuk ka objektiva të sakta për sezonin e ardhshëm, megjithatë ne do të tentojmë të bëjmë maksimumin tonë në arenën europiane. Sa i përket të ardhmes time, shpresoj të vazhdoj te Karabaku pasi këtu kam shumë vite dhe ndihem si në familje.
Ndërsa sa i përket Kombëtares, e rëndësishme në futboll dhe në çdo fushë të jetës është pasioni që ti ke për punën që bën. Duke pasur pasion dhe vullnet në këtë punë, mendoj se çdo gjë mund të arrihet”, është shprehur Agolli.
