Ish kreu i LSI-së deklaroi gjatë një komunikimi për gazetarët se, nëse do të flisnim për humbje nga marrëveshja Rama-Basha, PS e PD kanë humbur më shumë se LSI.
Teksa shprehu kënaqësinë për zhbllokimin e situatës politike, Meta i njohu meritat edhe LSI-së si kontribuese kryesore, por edhe si parashikuese e saktë e asaj çka do të prodhonte më pas marrëveshja.
“Nëse ka një forcë që duhet të jetë e gëzuar më shumë e PS e PD, për arritjen e kësaj marrëveshjeje, është LSI-ja, për arësye se ka punuar gjithmonë për këtë kosnensus dhe stabilitet, duke theksuar që në krye të herës që duhet qeveri besimi, ajo që u arrit, pasi Rama fitoi besimin e Bashës”, u tha Meta gazetarëve.
Ai shtoi se “nga implementimi i marrëveshjes, LSi ka humbur vetëm një mandat, në një kohë që kishte shprehur gatishmërinë për të vënë në dispozicion të zgjidhjes të gjitha mandatet politike”. Sakaq u kujtoi aleatëve në qeveri, Ramës, se humbi një përfaqësim shumë më të madh në qeverisje, dhe Bashës se humbi disa kërkesa të cilave iu përmbajt gjatë me këmbëngulje.
Gjithashtu në vlerësimin e Metës, të humbura janë edhe disa parti të vogla të cilave në saj të marrëveshjes, u është mohuar përfshirja në koalicione parazgjedhore.
Duke folur për pritshmëritë e LSI-së për zgjedhjet e 25 qershorit, Meta foli me nota optimizmi.
Referuar edhe rezultateve të zgjedhjeve vendore në 2015, ai tha se LSI merr ,7 mandate të sigurta në Tiranë, 4 në Durrës, 4 në Fier, 4 në Elbasan e 3 në Korçë.
