Ndonëse kishte planifikuar vetëm tre lindje, rrjedha e jetës mori një tjetër drejtim. Një nënë 41-vjeçare ka plot 16 fëmijë, të gjithë të shëndetshëm. Ajo, një pjesë të lëvdatave ia jep vjehrrës së saj, e cila i ka qëndruar pranë në çdo çast. Ndonëse vetëm bashkëshorti i saj mban familjen, të gjithë ia kanë dalë për të jetuar me ato pak kushte që kanë. Një shtatzëni e paplanifikuar, por që është mirëpritur në familjen e madhe.
Në 25 vitet e martesës së saj, Bahrie Gashi ka pasur 19 shtatzëni. Prej të cilave tri kanë dështuar, dhe 16 kanë qenë të suksesshme. Ditë më parë, 41-vjeçarja nga Prishtina solli në jetë fëmijën e saj të 16-të, lindje të cilën e realizoi në kushte shtëpie. Një ditë më pas, ajo është dërguar në spital, ku po vazhdon të qëndrojë, me foshnjën e cila raportohet të jetë në gjendje shëndetësore mjaft të mirë.
“Katër fëmijë i kam lindur në spital, të tjerët në shtëpi më ndihmën e Zotit dhe të vjehrrës. Vjehrra më ka ndihmuar…Por, është më mirë në spital, sepse është kujdesi më i mirë dhe pritja më e mirë”, ka thënë ajo. Po kështu ajo ka shtuar se familja mbahet falë njerëzve që i ndihmojnë.
“Planifikimi ka qenë vetëm tre, po që Zoti deshi kështu. Për sa i takon kushteve financiare, nuk mund të lavdërohem, sepse vetëm burri punon. Ndihmë nga shteti nuk marr, asistencë sociale nuk kam. Thjesht njerëzit na ndihmojnë nga pak”.
