Prokuroria po kryen kontroll në banesën e ish-ministrit Saimir Tahirit. Vetëm para pak minutash, katër oficerë të policisë gjyqësore kanë mbërritur në banesën e Tahirit për të bërë kontrollin në banesë. Ky kontroll po vjen menjëherë pas autorizimit nga parlamenti një ditë më parë të kërkesës së prokurorisë për kontrollin e banesës.
Oficerët e policisë gjyqësore janë ngjitur në shtëpinë e deputetit Tahiri bashkë me dosjet e tyre, ndërsa në banesë bashkë me Tahiri është edhe avokati. Vetë deputeti Tahiri nuk ka pranuar të flasë për mediet.
Një ditë më parë, Kuvendi miratoi raportin e shumicës, ku kërkohet hetim në gjendje të lirë për deputetin Saimir Tahiri, kontroll të banesës së tij dhe mos lejimi i daljes jashtë nga Shqipëria. Nga ana tjetër, u rrëzua raporti i opozitës ku kërkohej arrestimi i deputetit Tahiri.
Tashmë Tahiri është deputet i lirë, pasi u përjashtua nga Rama, i cili tha se ish-ministri do vijojë të jetë i tillë deri kur të përfundojnë hetimet.
