Avokatja e Popullit i ka dërguar Kuvendit katër emra, propozime nga shoqëria civile për vendin në Këshillin e Lartë të Prokurorisë. Në dëgjesën e mbajtur në institucionin e Avokatit të Popullit, kandidatët i pari i cili ka folur ka qenë Alfred Balla, më pas kanë folur kandidatët Andi Murataj dhe Entela Hoxha. Ndërsa Mimoza Qinami ka qenë kandidatja e parë e cila ka kaluar provën që në dëgjesën e parë. KLP është një nga hallkat që duhen plotësuar për institucionet e reja të drejtësisë.
Kandidati i parë, Alfred Balla në seancën dëgjimore ka deklaruar se ka një eksperiencë 26-vjeçare si prokuror, avokat dhe këshilltar ligjor në Gjykatën e Lartë. Në vitin 2009 Balla është zgjedhur anëtar i Komisionit të Konkurrencës. Ndër të tjera, Balla u shpreh se “duhet rikthyer besimi i qytetarëve te prokuroria, e cila sipas tij nuk duhet të flejë mbi dosje“. Gjithashtu ai tha se “po të bëhem anëtari KLP, pretendoj të bëhem edhe kryetar”.
Alfred Balla by Tirana Today on Scribd
Kandidati i dytë, Andi Murataj shpalos platformën e tij. Andi vjen nga Shoqëria Civile, avokat me një eksperiencë të gjatë. Po kështu ai është koordinator dhe menaxher projektesh, ekspert dhe avokat pranë Komitetit Shqiptar të Helsinkit. Sakaq Andi Muratej ka kryer edhe një sërë kursesh pas universitare. Ka punuar në inspektoratin e mbrojtjes së territorit, në Ministrinë e Drejtësisë. Murataj thekson: “Sistemi gjyqësor ka probleme. Ka mangësi transparence në institucionet e drejtësisë. Do jap kontributin që drejtësia të jetë model”. Dhe kandidatja e tretë për postin e KLP Entela Hoxha ka nisur të prezantojë eksperiencën e saj dhe platformën pë drejtimin e këtij institucioni.
Kandidaja e tretë, Entela Hoxha, juriste nga Shkodra është shprehur se “Krijimi i rasteve strategjike për tu bërë si shembull për të ardhmen që të ndryshohet perceptimi. Eksperienca me prokurorinë ka qenë si pedagoge.” Ajo ka deklaruar se “në fund zgjedhja e Kryeprokurorit do të jetë politike”. Hoxha vijon prej vitit 2002 punën si pedagoge në universiteti “Luigj Gurakuqi”, në Fakultetin e Drejtësisë. Hoxha ka firuar gradën shkencore “Doktor” në Universitetin e Tiranës.
Kandidatja e katërt, Mimoza Qinami ka qenë kandidatja e parë e cila ka kaluar provën që në dëgjesën e parë. Qinami ka përfunduar studimet universitare për drejtësi në vitet 1991-1994, dhe ka më shumë se 15 vjet përvojë pune në profesion si juriste. Mimoza ka një profil të spikatur shoqëror, integritet të lartë moral dhe përgatitje të lartë profesionale në fushën e drejtësisë dhe të drejtave të njeriut. Në kohën e kandidimit, ka qenë e punësuar për të paktën 5 vjet, me kohë të plotë ose me kohë të pjesshme pa ndërprerje, në një organizatë të shoqërisë civile për fusha të lidhura me sistemin e drejtësisë ose të drejtat e njeriut.
Tre kandidatëve të tjerë, përveç Alfred Ballës, nuk iu gjetën formularët e dekriminalizimit në internet. Të paktën jo të bërë publik. Tirana Today
