Një 43-vjeçar nga Iraku përfundoi në prangat e policisë federale të Australisë, pasi dyshohet se ka organizuar trafikimin e njerëzve dhe shkaktimin e më shumë se 350 viktimave, kur një barkë u përmbyt në vitin 2001.
I dyshuari u arrestua në aeroportin e Brisbane-t ditën e djeshme, pas ekstradimit të tij nga Zelanda e Re.
Sipas njoftimit të policisë, 43-vjeçari akuzohet për organizim të trafikimit të grupeve të të huajve drejt Australisë. Po ashtu, dyshohet se ky person ka qenë pjesë e një grupi që është marrë me trafikimin e njerëzve kryesisht nga Iraku dhe Afganistani në Australi.
“Të mos e harrojmë faktin se më shumë se 350 njerëz vdiqën në këtë tragjedi. Ata meritojnë drejtësi dhe ne mbesim të përkushtuar që t’i ndalojmë ata që përfitojnë nga ky lloj tregtie”, deklaroi një shef policie.
“Independent” shkruan se nëse 43-vjeçari shpallet fajtor, irakiani mund të dënohet maksimalisht me dhjetë vjet burgim.
